پېکن کې د شي جین‌پینګ له لوري د هسپانیا د پاچا رسمي استقبال؛ د ۹ مهمو هوکړه‌لیکونو لاسلیک

پېکن – د چين دولتي رسنیو راپور ورکړی چې د چين ولسمشر شي جين‌پینګ د چهارشنبې په ورځ په ستر او درناوي ډک مراسمو کې د هسپانیا پاچا فلیپه شپږم او د هغه ملکې ته په «د خلکو ستر ماڼۍ» کې هرکلی ووایه. دا لیدنه د هسپانیا د پاچا او ملکې رسمي سفر برخه ده چې د نومبر له ۱۱مې تر ۱۳مې پورې په چين کې تر سره کېږي

د دواړو هېوادونو مشرانو تر رسمي مراسمو وروسته پر ۹ مهمو همکاریزو هوکړه‌لیکونو لاسلیک وکړ. دغه تړونونه د سیاست، اقتصاد، کلتور، ټکنالوژۍ او دوه‌ اړخیزو اړیکو د لا ژورتیا برخو ته ځانګړي شوي دي. چارواکي وايي چې دغه اسناد به د چين او هسپانیا ترمنځ د همکاریو نوې دروازې پرانیزي او ګډې پروژې به تسریع کړي

شي جين‌پینګ او پاچا فلیپه شپږم د خبرو پر مهال ټینګار وکړ چې پېکن او مادريد غواړي د «ستراتېژیکې هر اړخیزې ملګرتیا» د لا پراختیا له لارې د دواړو هېوادونو اړیکې نوي پړاو ته یوسي. دواړو لورو د اعتماد، سوداګرۍ، پانګونې، ګرځندوی او فرهنګي تبادلو په پراخولو موافقه وکړه او دا یې د راتلونکې لپاره مهم ګام وباله

دا سفر د پام وړ ځکه ګڼل کېږي چې د هسپانیا پاچا له شاوخوا ۱۸ کلونو وروسته لومړی ځل دی چې چین ته رسمي سفر کوي. سیاسي شنونکي باور لري چې دغه لیدنه به د اروپا او چین ترمنځ د اړیکو په تودېدو او د نوو همکاریزو لارو په رامنځته کېدو کې مهم رول ولوبوي

چینایي رسنیو دغه سفر «د دوه ملتونو د دوستۍ او اوږدمهاله باور» نوی فصل بللی، او په مادرید کې هم دا سفر د راتلونکو کلونو لپاره د هسپانیا د نړیوالو همکاریو د پراختیا په برخه کې یو ارزښتناک فرصت ګڼل شوی دی