سفر والی بلخ به تاجیکستان؛ چرخش در روابط کابل و دوشنبه

سفر والی بلخ به تاجیکستان؛ چرخش در روابط کابل و دوشنبه

بریانیوز:(شنبه۳ عقرب/لړم) یوسف وفا، والی تحریک طالبان در بلخ و از نزدیکان هبت‌الله آخندزاده، به دعوت رسمی حکومت تاجیکستان به دوشنبه سفر کرده و با مقام‌های ارشد این کشور دیدار کرده است.

این سفر که از سوی حامیان طالبان با شور و استقبال روبه‌رو شده، به‌گفته ناظران گامی مهم در جهت عادی‌سازی روابط میان  تحریک طالبان و تاجیکستان ارزیابی می‌شود؛ روابطی که تا کنون سرد و محتاطانه بود.

تاجیکستان ازگذشته های دوریکی از پایگاه‌های اصلی جبهه متحد شمال به رهبری استاد برهان الدین ربانی و احمد شاه مسعود محسوب میگردید، کشوری که درحال حاضر نیزپایگاه اساسی نیروهای مسلح مخالف تحریک طالبان بوده است، به باور آگاهان، نزدیکی احتمالی این کشور با تحریک طالبان، می‌تواند موقعیت سیاسی و پشتیبانی منطقه‌ای نیروهای مخالف طالبان را تضعیف کند.

امام‌علی رحمان، رییس‌جمهور تاجیکستان، د کنفرانس کشورهای مستقل مشترک‌المنافع درباره مبارزه با تروریسم در دوشنبه گفته است که ثبات در افغانستان نقشی کلیدی در تأمین امنیت تاجیکستان و کل منطقه دارد.

رییس‌جمهور تاجیکستان از فعالیت های نیروهای مخالف این کشور در امتداد مرزهای کشورهای مستقل مشترک‌المنابع اظهار نگرانی کرده است.

او بر همکاری نزدیک میان نهادهای استخباراتی کشورهای عضو برای مقابله با افراط‌گرایی و قاچاق مواد مخدر تأکید کرد. این اظهارات هم‌زمان با سفر هیئتی از تحریک طالبان به تاجیکستان بیان شده است.

به گزارش «رادیو حریت»، رسانه وابسته به تحریک طالبان، مقامات تاجیکستان در دیدار با هیأت بلندپایه  تحریک طالبان به ریاست محمد یوسف وفا، والی طالبان در بلخ، اعلام کرده‌اند که به مخالفان این تحریک  اجازه فعالیت در خاک تاجیکستان داده نخواهد شد.

بر اساس این گزارش، دگرجنرال سیدموف سیدمومن ستاراویچ، وزیر استخبارات تاجیکستان، در نشست با هیأت تحریک طالبان در شهر دوشنبه گفته است:

«به هیچ گروه یا فردی که هدفش بی‌ثبات‌سازی افغانستان باشد، اجازه فعالیت در تاجیکستان داده نمی‌شود.»

به اساس گزارش، یوسف وفا، والی ط-البان در بلخ، در سفر اخیر خود به تاجیکستان با شماری از مقامات و علمای آن کشور دیدار کرده است. سخنگوی والی بلخ در صفحه رسمی خود در شبکه‌های اجتماعی نوشته است:«والی بلخ، منشور، سیاست و وصایای امیرالمؤمنین حفظه‌الله‌تعالی را به‌عنوان یک تحفه کامل به علمای تاجیکستان سپرد تا آنان با هدف و مفکوره امارت اسلامی آشنا شوند.»

بر اساس این اظهارات، والی بلخ «منشور و سیاست امارت اسلامی» را در قالب یک هدیه رسمی به علمای تاجیکستان ارائه کرده است.