د ۵۸۹ زره ډالرو په ارزښت دوه مهم هوکړه‌لیکونه؛ د بېوزلو او درمل شوو معتادینو د هیلې نوې سحر

په یوه انسان‌پاله او هیلمن اقدام کې، د افغانستان د ملی مبارزې او د حوادثو د مدیریت اداره او د افغان ځوانانو خدماتي مؤسسه د ۵۸۹ زره امریکایي ډالرو په ارزښت دوه هوکړه‌لیکونه لاسلیک کړل. دا هوکړه‌لیکونه به د زرګونو افغانانو د ژوند د بدلون، اقتصادي پیاوړتیا او د ټولنیزې هوساینې لپاره عملي ګامونه شي

د دغو پروګرامونو له مخې، په غزني، لوګر، خوست او پکتیکا ولایتونو کې به د خلکو د پوهاوي او روزنې ځانګړي کورسونه ترسره شي، څو د طبیعي پېښو پر وړاندې د هغوی چمتووالی لوړ شي او وکولای شي د خطرونو پر وړاندې خپله او د خپلې ټولنې ساتنه وکړي

بل مهمه برخه یې د هغو معتادینو ملاتړ دی، چې له درملنې وروسته غواړي د ژوند نوې پاڼه پرانیزي. د پروګرام له مخې، دغو کسانو ته به نغدي مرستې او د کار وسایل ورکړل شي، څو د خپل لاس عاید له لارې باعزته ژوند ته دوام ورکړي او د ټولنې مثبت غړي شي

د حوادثو د مبارزې ملي ادارې ویاند ویلي، دا پروګرامونه به د خلکو اقتصادي بنسټونه پیاوړي کړي او د ټولنې د ثبات، کارموندنې او بشري کرامت د خوندي کولو په برخه کې اغېزمن بدلون راولي

د افغان ځوانانو د خدماتي مؤسسې مسوولینو هم ټینګار کړی چې دا مرستې به په شفافه او عادلانه توګه هغو کسانو ته ورسېږي چې ریښتینې اړتیا لري، او د پروژې تطبیق به د سیمه‌ییزو خلکو په همکارۍ ترسره کېږي

دغه نوښت د زرګونو افغان کورنیو لپاره د هیلې یو نوی څراغ بللی شي — کورنۍ چې د بې‌کارۍ، فقر او اعتیاد له سیورو وروسته، اوس د روښانه او باعزته ژوند پر لور ګامونه اخلي