په ایران کې د افغان کډوالو له شړلو وروسته مزدونه دوه برابره لوړ شوي – د کارګرو کمښت د جدي اندېښنې لامل شوی

کابل – د تهران د استوګنځایونو د مشاورینو د اتحادیې مشر سعید لطفي ویلي چې د افغان کډوالو له شړلو وروسته، د ایران په پلازمېنه تهران کې د کارګرو مزدونه نږدې دوه برابره لوړ شوي دي

د ایران رسنیو د سه‌شنبې په ورځ (۶ عقرب) د نوموړي له خولې راپور ورکړی چې دا هېواد اوس له جدي کارګر کمښت سره مخ دی، ځکه چې ډېری هغه کارونه چې افغان کارګر به یې ترسره کول، اوس بې‌سارې پاتې دي

لطفي زیاته کړه چې افغان کډوال زیاتره د تهران په جنوبي سیمو کې اوسېدل او د خپلو دندو ترڅنګ به یې د استوګنې ځای هم هماغه ودانۍ یا د کار ساحه وه. د ده په وینا، دا کډوال د ودانیزو چارو، ساختماني کارونو او فزیکي مزدورۍ مهمه برخه جوړوله، خو له دوی پرته د بازار اړتیاوې پوره کول ګران شوي دي

نوموړي وویل:

موږ اوس کارګر لرو، خو نه هغه ماهر کارګر چې د کار بازار ته ژر داخل شي. باید د کارګرانو د روزنې جدي پروګرامونه پیل شي

په ورته وخت کې، راپورونه څرګندوي چې د ایران حکومت لا هم د افغان کډوالو د شړلو بهیر ته دوام ورکوي، چې دا کار نه یوازې په اقتصادي برخه کې اغېز ښندي، بلکې د بشري او ټولنیزو ستونزو د زیاتېدو سبب هم ګرځي

د یادونې وړ ده چې د ایران سفارت په کابل کې د افغان وګړو لپاره د کاري ویزې ورکولو بهیر هم سخت کړی او له دې وروسته د کارفرما یا تضمین کوونکي له تایید پرته هېڅ افغان ته کاري ویزه نه ورکوي

شنونکي وايي، د افغان کډوالو شتون د ایران د کار بازار د ثبات یو مهم لامل و، او د هغوی ناڅاپي اخراج د اقتصاد پر بنسټیزو برخو — په ځانګړي ډول ودانیزو چارو، کرنې او خدمتونو — مستقیم اغېز کړی دی

په دې توګه، داسې ښکاري چې د کارګر کمښت او د مزدونو لوړېدل د هغو پالیسیو طبیعي پایله ده چې له انسانیت او اقتصادي واقعیت دواړو سره په ټکر کې دي