د نتانیاهو د ادعا وروسته؛ اسراییلي ځواکونو د غزې په جنوب کې وحشیانه بریدونه پیل کړي — رفح ښار د اور او لوګي په لمبو کې

غزه – د جګړې تود باد یو ځل بیا د فلسطین پر ولس چپه شوی دی. د اسراییلي رسنیو د راپورونو له مخې، د سه‌شنبې ماښام اسراییلي الوتکو او توپچي ځواکونو د غزې په جنوبي ښار رفح باندې درانه او بې‌رحمانه بریدونه ترسره کړي دي 

دا بریدونه وروسته له هغې پیل شول چې د اسراییلو لومړي وزیر بنیامین نتانیاهو ادعا وکړه، ګواکې د حماس ډلې د اوربند شرایط مات کړي دي. خو د فلسطیني چارواکو په وینا، دا یوازې یو پلمه او دروغجن دلیل دی، ځکه چې د اوربند سرغړونه تل د اسراییلو له لوري شوې ده

د رفح ښار د بمونو لاندې

د رفح اوسېدونکي وایي، د ښار پر ګڼ مېشتو سیمو د شپې له خوا په پرله‌پسې ډول بمبارونه وشول. د اور لمبې د آسمان تر څو مترو پورته شوې وې، د کورونو دیوالونه رېزشول او د ماشومانو او ښځو چیغې هر لور ته خپرې وې

یوه سیمه‌ییز ډاکټر د وضعیت په اړه وویل:

رفح د مرګ او ویر ښار ته بدل شوی دی. هره شېبه یو کور ړنګېږي، یوه کورنۍ ورکېږي او نړۍ بیا هم چوپه ده

د سولې دوکه که د جګړې پلمه؟

سیاسي شنونکي وایي، د نتانیاهو ادعا د جګړې د دوام لپاره یوه نوې بهانه ده. د هغوی په باور، د اسراییلو حکومت غواړي د کورنیو ناکامیو او نړیوال فشارونو د پټولو لپاره د جګړې لمبې تودې وساتي 

د سیاسي چارو شنونکي ډاکټر فرید مومند زیاتوي:

د اسراییلو مشرتابه د اوربند تر نامه لاندې تل جګړه پټه کړې ده. دوی د سولې خبرې کوي، خو بمونه غورځوي

د فلسطین د روغتیا وزارت د وروستي راپور له مخې، د رفح په ښار کې لسګونه کسان وژل شوي او ګڼ شمېر نور ټپیان دي. د ډېرو قربانیانو جسدونه لا هم د کنډوالو لاندې دي، او د ژغورنې ډلې له سختو ستونزو سره مخ دي 

د نړۍ غبرګون 

د ملګرو ملتونو، قطر، ترکیې او ګڼو بشري سازمانونو د اسراییلو دا بریدونه په سختو ټکو غندلي دي.

د ملګرو ملتونو د بشري حقونو شورا ویلي:

هر هغه اقدام چې د ملکي وګړو ژوند له خطر سره مخ کوي، د نړیوال قانون ښکاره سرغړونه ده

خو د اسراییلو حکومت تر اوسه د نړیوالو غوښتنو پر وړاندې هیڅ عملي غبرګون نه‌دی ښودلی

په داسې حال کې چې د رفح بې‌وسه خلک د بمونو او لوګي تر منځ د ژوند وروستۍ ساه اخلي، نتانیاهو لا هم د "ځوابي بریدونو" تر پلمې لاندې جګړه توجیه کوي

خو د نړۍ د میلیونونو خلکو په باور، دا جګړه د ځان دفاع نه، بلکې د اشغال دوام او د انسانیت شرم دی

غزه لا هم سوځي... او نړۍ لا هم چوپه ده