جاپان د تایوان ترڅنګ د نوو توغندیو د ځای پرځای کولو پرېکړه؛ بېجینګ ته روښانه پیغام

د ختیځې آسیا په جغرافیه کې له وروستیو پوځي بدلونونو سره سم، جاپان اعلان کړی چې د خپلې دفاعي ستراتیژۍ د پیاوړتیا په موخه به د منځ‌ واټن پرمختللي توغندي د تایوان ترڅنګ نظامي سیمو ته ولېږي؛ یو اقدام چې کارپوهان یې د چین لپاره "مستقیم او بې‌ساری خبرداری" بولي

د جاپان د دفاع وزیر د یو ستراتیژیک پوځي بېس له لیدنې وروسته وویل چې توکیو نور د سیمې د امنیت د خرابېدو په وړاندې چوپه خوله کېناستل نه‌شي زغملای. هغه څرګنده کړه چې د توغندیو نوی سیستم به د لنډو او منځنیو ګواښونو پر وړاندې د جاپان د دفاعي قدرت د لوړولو لپاره مهم رول ولوبوي

د چین او جاپان اړیکې له اوږدې مودې راهیسې د سیمه‌ ییزو لانجو، د جزایرو تر ملکیت پورې شخړو او د تایوان د وضعیت پر سر د اختلاف له امله له تنشونو ډکې دي. اوسني پوځي ګامونه بیا د دې تنش تازه څپه نوره هم پیاوړې کړې ده

کارپوهان باور لري چې د توغندیو ځای پر ځای کول نه یوازې د جاپان د دفاعي تګلارې مهم پرمختګ دی، بلکې په سیمه کې د ځواک توازن ته نوې بڼه ورکولی شي. د دوی په وینا، دا ګام د جاپان هغه پریکړتیا ښيي چې د محدودو پوځي وړتیاوو له دودیز چوکاټ څخه راووځي او د چین د زیاتېدونکي نفوذ مقابله وکړي

په همدې حال کې، بیجینګ د دې اقدام په اړه اندېښنه ښودلې او توکیو یې د "ځان‌پارونکو عملیاتو" په ترسره کولو تورن کړی. خو جاپان ټینګار کوي چې نوې دفاعي تکړتیاوې یې یوازې د خپل ملي امنیت د خوندي کولو لپاره دي

د سیمې څارونکي وایي، که وضعیت همداسې دوام ومومي، جاپان، چین او تایوان کېدای شي د ختیځې آسیا امنیتي انځور د یوې نوې او خطرناکې مرحلې پر لور بوځي