په کابل کې د قرغیزستان د سوداګرۍ خونې پرانیسته؛ د اقتصادي اړیکو نوی پړاو

 د طالبانو د صنعت او سوداګرۍ وزارت اعلان کړی، چې کابل ته د قرغیزستان د لوړپوړي پلاوي د سفر پر مهال د افغانستان په پلازمېنه کې د قرغیزستان د سوداګرۍ خونه په رسمي ډول پرانیستل شوه. دا ګام د دواړو هېوادونو ترمنځ د سوداګریزو او اقتصادي اړیکو د پراختیا په لور یو مهم پرمختګ بلل کېږي

د صنعت او سوداګرۍ وزارت د چهارشنبې په ورځ، د قوس ۲۶مه، په خپره شوې خبرپاڼه کې ویلي، چې د یادې سوداګرۍ خونې افتتاح به د افغانستان او قرغیزستان ترمنځ د سوداګرۍ د اسانتیا، پانګونې د جذب او اقتصادي همکاریو د بنسټیز کېدو لپاره زمینه برابره کړي

د وزارت په وینا، دغه مرکز به د دواړو هېوادونو د سوداګرو ترمنځ د اړیکو د ټینګښت، د سوداګریزو فرصتونو د پېژندنې، د صادراتو او وارداتو د پراختیا او د ګډو اقتصادي پروژو د عملي کېدو لپاره د یو اغېزناک پل رول ولوبوي. همدارنګه، تمه ده چې د قرغیزستان سوداګریز حضور په کابل کې به د سیمې د اقتصادي اتصال لپاره نوي فرصتونه رامنځته کړي

اقتصادي شنونکي وایي، چې د قرغیزستان د سوداګرۍ خونې پرانیسته کولای شي افغانستان ته د مرکزي اسیا له بازارونو سره د نښلېدو نوې دروازې پرانیزي او د دواړو هېوادونو ترمنځ د سوداګریز باور د پیاوړتیا لامل شي. دوی زیاتوي، چې دا ډول نوښتونه د افغانستان د اقتصادي ودې او د سیمه‌ییزو همکاریو د پراختیا لپاره مهم ارزښت لري

د طالبانو د صنعت او سوداګرۍ وزارت ټینګار کړی، چې د بهرنیو هېوادونو سره د سوداګریزو اړیکو پراختیا د هېواد د اقتصادي ثبات او ځان‌بساینې په لور یو مهم ګام دی، او په دې برخه کې به ورته هڅې لا پسې پراخې شي