د ایران د بهرنیو چارو وزیر: فضایي پرمختګ د ایران طبيعي حق دی

د ایران د اسلامي جمهوریت د بهرنیو چارو وزیر، سید عباس عراقچي، ویلي چې د فضا په برخه کې پرمختګ د ایران طبیعي او مشروع حق دی او دا فعالیتونه د نړۍ د نورو هېوادونو په څېر په بشپړه توګه سوله‌ییز اهداف لري

عراقچي دا څرګندونې د ایران د سپوږمکیو د نږدې توغولو په درشل کې د ایران د ملي راډیو او ټلویزیون له خبري اژانس سره په مرکه کې کړې دي. نوموړي وویل چې ایران په وروستیو کلونو کې د علم او ټکنالوژۍ په بېلابېلو برخو کې د پام وړ لاسته‌راوړنې لرلې دي او د درېیو سپوږمکیو توغول هم د همدې پرمختګونو یوه مهمه بېلګه ده.

سوله‌ییز اهداف او ملي ګټې

د ایران د بهرنیو چارو وزیر ټینګار وکړ چې یادې سپوږمکۍ د بشپړ سوله‌ییزو موخو لپاره کارول کېږي او له اقتصادي، مخابراتي او چاپېریالي اړخه به مهمې ګټې ولري. د هغه په وینا، دا سپوږمکۍ به د اړیکو د پیاوړتیا، د طبیعي سرچینو د څار، د چاپېریال ساتنې او د اقتصادي پلان جوړونې په برخه کې اغېزمن رول ولوبوي

عراقچي وویل: «د فضا په برخه کې فعالیت د ایران طبیعي حق دی، لکه څنګه چې د نړۍ نور هېوادونه هم په دې ډګر کې کار کوي. دا پرمختګونه هېڅ هېواد ته ګواښ نه دي او نه هم د نظامي موخو لپاره دي

د علمي او ټکنالوژیکي ودې ټینګار

نوموړي زیاته کړه چې د ایران پرمختګونه یوازې په فضایي برخه پورې محدود نه دي، بلکې د علم او ټکنالوژۍ په نورو برخو، په ځانګړي ډول نانو ټکنالوژۍ کې هم د پام وړ پرمختګونه شوي دي. د عراقچي په وینا، دا لاسته‌راوړنې د دې لپاره دي چې د علمي او عملي وړتیاوو کارونه پراخ شي او د ایراني ځوانانو استعدادونه د هېواد د ودې او پرمختګ لپاره وکارول شي

هغه وویل چې د ایران اسلامي جمهوریت د خپلو ځوانانو پر پوهه، نوښت او وړتیاوو تکیه لري او هڅه کوي چې د علم او ټکنالوژۍ له لارې د هېواد د دوامدار پرمختګ بنسټونه ټینګ کړي

نړیوال پیغام

سیاسي شنونکي باور لري چې د ایران دا څرګندونې د نړیوالو اندېښنو د کمولو په موخه دي، څو دا وښيي چې د تهران فضایي فعالیتونه د نړیوالو اصولو په چوکاټ کې او د سوله‌ییزو موخو لپاره ترسره کېږي

په داسې حال کې چې ایران د خپلو سپوږمکیو د توغولو لپاره چمتووالی نیسي، د دې هېواد چارواکي ټینګار کوي چې علمي پرمختګ، ځان‌بسیاینې او سوله‌ییزې ټکنالوژۍ د ایران د راتلونکي اساسي ستنې دي