په هرات کې پر ښځو سخت چلند؛ د حجاب په پلمه له ټکسیو اجباري ښکته کول او د طالبانو د محتسبانو د وسلو ګواښونه

 بریانیوز:(پنجشنبه۲۵جدی۱۴۰۴)هرات – د هرات ولایت څخه محلي سرچینې خبر ورکوي چې په وروستیو ورځو کې د طالبانو د

«امر بالمعروف او نهی عن المنکر» محتسبانو د ښار په بېلابېلو سیمو کې خپل محدودیتونه او فشارونه سخت کړي دي. د راپورونو له مخې، طالبانو په څلورلارو، اصلي سړکونو او حتی فرعي کوڅو کې د تلاشي او کنټرول پوستې جوړې کړې او ښځې د «بشپړ حجاب» د نشتوالي له امله له ټکسیو او نورو موټرو په زوره ښکته کوي

سرچینې وایي، هغه ښځې چې برقع یا د طالبانو له نظره «مطلوب حجاب» نه لري، د سړک پر سر درول کېږي، پوښتنې ترې کېږي او ان ځینې وخت د سپکاوي او ګواښ سره مخ کېږي. د هرات یوې اوسېدونکې ښځې رسنیو ته ویلي چې له خپل مېړه سره په موټر کې روانه وه، خو محتسبانو موټر ودراوه او تر پوښتنو وروسته یې د دوی د کورنۍ اړیکې وڅېړلې

دې ښځې زیاته کړې چې کله د هغې مېړه د محتسبانو له چلنده ناخوښي وښوده، نو د طالبانو له جنګیالیو څخه یو یې وسلې ته لاس کړ او د ډزو ګواښ یې وکړ. د هغې په وینا، که څه هم ډزې ونه شوې، خو دا پېښه د دوی لپاره سخته وېره او رواني فشار رامنځته کړ

محلي اوسېدونکي وایي، دا ډول پېښې نورې هم زیاتې شوې دي او د ښار ښځې د تګ راتګ پر مهال له جدي وېرې سره مخ دي. ډېری ښځې هڅه کوي پرته له اړتیا له کوره ونه وځي، ځکه چې هره شېبه د سپکاوي، نیونې او یا هم د تاوتریخوالي خطر شته

د ښځو د حقونو فعالان وایي، دا اقدامات د ښځو د بنسټیزو بشري حقونو ښکاره سرغړونه ده او د هرات ښځې یې له ټولنیز ژوند څخه لا زیاتې شاته تمبولې دي. د دوی په وینا، د حجاب تر نامه لاندې زور، ګواښ او وسلوال چلند نه دیني توجیه لري او نه هم انساني

دا وضعیت په داسې حال کې رامنځته کېږي چې طالبانو تر دې وړاندې هم اعلان کړی و چې ښځې نشي کولی پرته له برقع دولتي ادارو ته داخلې شي. دا پرېکړه لا دمخه د ښځو پر کار، زده‌کړو او ټولنیز حضور سخت محدودیتونه لګولي وو، خو تازه راپورونه ښيي چې دا بندیزونه اوس له ادارو هاخوا، د ښار تر کوڅو او سړکونو پورې غځېدلي دي

سیاسي شنونکي باور لري چې دا ډول سخت دریځ د طالبانو پر وړاندې د ولسي نارضایتۍ کچه لوړه کولی شي، په ځانګړي ډول په هغو ښارونو کې چې ښځې پکې له پخوا نسبي ازاد تګ راتګ درلود. د دوی په وینا، پر ښځو دوامدار فشار نه یوازې د ټولنې نیمایي برخه له فعاله ژوند څخه وباسي، بلکې د افغانستان نړیوال انځور لا پسې زیانمنوي

په ټوله کې، د هرات د ښځو وروستي راپورونه ښيي چې د طالبانو له لوري د حجاب د پلي کولو تګلاره ورځ تر بلې سختېږي. هغه څه چې د «اخلاقي کنټرول» په نوم روان دي، د ډېرو ښځو لپاره د وېرې، سپکاوي او د ورځنیو ازادیو د لا محدودېدو په معنا تعبیرېږي، او دا پوښتنه لا هم پر ځای ده چې دا لړۍ به تر کومه دوام کوي