اسلام‌اباد – په پاکستان کې د ایران سفیر: ټرمپ تهران ته پیغام ورکړی چې پر ایران د برید نیت نه لري

 بریانیوز:(جمعه۲۶ جدی۱۴۰۴)  په پاکستان کې د ایران د اسلامي جمهوریت سفیر رضا امیری‌مقدم ویلي، چې د امریکا ولسمشر ډونالد ټرمپ د تهران له چارواکو سره اړیکه نیولې او هغوی ته یې ډاډ ورکړی چې امریکا پر ایران د پوځي برید پلان نه لري. دا څرګندونې په داسې حساس وخت کې کېږي چې د ایران کورنی وضعیت او د امریکا ـ ایران اړیکې د نړیوالو بحثونو په سر کې دي

د پاکستان د معتبرې ورځپاڼې «دان» د راپور له مخې، امیری‌مقدم نن (پنجشنبه) خبریالانو ته وویل چې دا پیغام د تېرې شپې شاوخوا ۱:۰۰ بجې ایران ته رسېدلی دی. د هغه په وینا، د امریکا ولسمشر په خپل پیغام کې له ایران څخه د خویشتن‌دارۍ غوښتنه کړې او ټینګار یې کړی چې تهران دې د امریکا پر ګټو یا متحدینو برید نه کوي

د ایران سفیر ادعا وکړه چې ټرمپ هڅه کوي د مستقیمې پوځي مقابلې مخه ونیسي او وضعیت له کنټروله وتلو ته پرې نه ږدي. هغه زیاته کړه چې دا پیغام ښيي واشنګټن د سیمې د امنیتي وضعیت حساسیت درک کړی او نه غواړي کړکېچ په جګړه واوړي

دا څرګندونې وروسته له هغې مطرح کېږي چې ډونالد ټرمپ تر دې وړاندې په سختو الفاظو خبرداری ورکړی و، که د ایران حکومت د روانو اعتراضونو پر مهال د معترضانو کشتار او اعدامونو ته دوام ورکړي، نو امریکا به پر ایران سخته او بې‌سارې ضربه وارد کړي. همدې ګواښونو د نړیوالو رسنیو، سیاسي شنونکو او د سیمې د هېوادونو ترمنځ د احتمالي پوځي شخړې اندېښنې ډېرې کړې وې

سیاسي کارپوهان وايي، که څه هم دا پیغام د جګړې د مخنیوي یو نښه بلل کېږي، خو د امریکا او ایران ترمنځ اړیکې لا هم له ژورې بې‌باورۍ، بندیزونو او لفظي ګواښونو ډکې دي. د دوی په باور، د وضعیت ارامي تر ډېره د دواړو لوریو په عملي کړنو پورې تړلې ده، نه یوازې په لفظي پیغامونو

شنونکي زیاتوي چې که ایران او امریکا د زغم سیاست ته دوام ورکړي، ښايي د کړکېچ د کمېدو زمینه برابره شي؛ خو که د ګواښونو او فشارونو ژبه بېرته توده شي، نو د سیمې ثبات به یو ځل بیا له جدي خطر سره مخ شي