افغانستان لا هم د سیمې د اجنډا په سر کې؛ د شانګهای سازمان ټینګار

افغانستان لا هم د سیمې د اجنډا په سر کې؛ د شانګهای سازمان ټینګار

بریانیوز:(سه شنبه، ۱۸ حمل۱۴۰۵)

د سازمان همکاری شانگهای سرمنشي، نورلان یرمک‌بایف، ویلي چې که څه هم د افغانستان لپاره د دې سازمان د تماس ډلې فعالیتونه ځنډول شوي، خو د افغانستان وضعیت لا هم د غړو هېوادونو د پاملرنې په مرکز کې پاتې دی

یرمک‌بایف په خپلو وروستیو څرګندونو کې ټینګار کړی چې د افغانستان امنیتي، سیاسي او بشري وضعیت نه یوازې د دغه هېواد لپاره مهم دی، بلکې د ټولې سیمې پر ثبات مستقیم اغېز لري. هغه زیاته کړې چې د تماس ډلې ځنډېدل په دې معنا نه دي چې د شانګهای سازمان له اجنډا څخه افغانستان لرې شوی دی

د شنونکو په باور، د شانګهای سازمان غړي هېوادونه، چې پکې د سیمې ځواکمن هېوادونه هم شامل دي، د افغانستان له وضعیت سره ژوره علاقه لري، ځکه چې د دې هېواد هر ډول بې‌ثباتي کولی شي د سرحدي امنیت، ترهګرۍ او اقتصادي همکاریو پر بهیر اغېز وکړي

سره له دې چې د تماس ډله فعاله نه ده، خو ډیپلوماټیکې اړیکې او غیر رسمي سلا مشورې لا هم روانې دي. کارپوهان وایي چې د دې سازمان غړي هېوادونه هڅه کوي د افغانستان له اوسني وضعیت سره په احتیاط چلند وکړي او د ګډو ګټو پر بنسټ د حل لارې ولټوي

په ټوله کې، د نورلان یرمک‌بایف څرګندونې دا ښيي چې افغانستان لا هم د سیمې د سیاستونو یو مهم محور دی، او که څه هم ځینې رسمي چوکاټونه ځنډول شوي، خو د دې هېواد مسئله لا هم د نړیوالو او سیمه‌ییزو بحثونو په سر کې ځای لري