کابل کې ډیپلوماتیکې خبرې: متقي د پاکستان له مذاکراتو د پرمختګ پر دوام ټینګار وکړ

اشتراک گذاری:

بریانیوز:(پنجشنبه،۲۷ حمل۱۴۰۵)

د طالبانو د بهرنیو چارو وزیر امیرخان متقي په کابل کې د سعودي عربستان له سفیر سره په لیدنه کې د افغانستان او پاکستان ترمنځ د وروستیو خبرو اترو په اړه خبرې کړې دي او ویلي یې دي چې د دې بهیر په وړاندې «تخنیکي جزئیات او مختلف تفسیرونه» باید خنډ ونه ګرځي

د طالبانو د بهرنیو چارو وزارت په یوه رسمي بیان کې ویل شوي چې په دې کتنه کې د سیمه‌ییزو تحولاتو ترڅنګ د افغانستان او پاکستان ترمنځ د روانو مذاکراتو پر وضعیت هم بحث شوی دی

متقي ټینګار کړی چې د ستونزو د حل لپاره د خبرو اترو دوام مهم دی او اړتیا ده چې د نظر اختلافات د تعامل او تفاهم له لارې حل شي، څو د اړیکو د پرمختګ بهیر روان وساتل شي

په همدې لیدنه کې دواړو لورو د افغانستان او سعودي عربستان د دوه اړخیزو اړیکو پر اهمیت، د سیمې پر سیاسي او امنیتي وضعیت، او د همکاریو د پراخېدو پر لارو چارو هم خبرې کړې دي

شنونکي وايي، د افغانستان او سیمه‌ییزو هېوادونو ترمنځ دا ډول ډیالوګ د باور جوړونې او د ثبات د پیاوړتیا لپاره مهم ګڼل کېږي، په ځانګړي ډول هغه مهال چې سیمه د سیاسي بدلونونو له حساس پړاو څخه تېریږي

تر اوسه د دغو خبرو د عملي پایلو په اړه نور جزئیات نه دي خپاره شوي، خو دواړو خواوو د اړیکو پر دوام او د ګډو همکاریو پر پراختیا ټینګار کړی دی