اخبار جهان

نصیر احمد فایق د ملګرو ملتونو د عمومي اسامبلې د یو اتیا یمې دورې مرستیال وټاکل شو

اشتراک گذاری:

بریانیوز - چهارشنبه، ١٣ جوزا ١٤٠٥

د ملګرو ملتونو عمومي اسامبلې پرون د افغانستان د دایمي استازولۍ سرپرست نصیر احمد فایق د دې سازمان د عمومي اسامبلې د یو اتیا یمې دورې د مرستیال په توګه وټاکه

په همدې غونډه کې د بنګله‌دېش دایمي استازی خلیل‌الرحمن د عمومي اسامبلې د یادې دورې د رئیس په توګه وټاکل شو. ورسره هممهاله د عمومي اسامبلې د اصلي کمېټو د مشرتابه غړي هم غوره شول

نصیر احمد فایق له خپلې ټاکنې وروسته په خپره شوې اعلامیه کې ویلي چې افغانستان ویاړي چې د دې مهمې نړیوالې غونډې د مرستیالانو له ډلې ټاکل شوی او هیله لري چې د ټاکل شوي رئیس او د غړو هېوادونو په نږدې همغږۍ سره د عمومي اسامبلې د موخو او مسئولیتونو د پرمخ بېولو په برخه کې اغېزمنه ونډه واخلي

هغه زیاته کړې چې د نړیوالو همکاریو پیاوړتیا، د ګډو ننګونو پر وړاندې همغږي او د ملګرو ملتونو د اساسي موخو ملاتړ هغه برخې دي چې افغانستان غواړي په کې رغنده رول ولوبوي

د ملګرو ملتونو د عمومي اسامبلې مرستیالان د غونډو په تنظیم، د کاري بهیر په همغږۍ او د سازمان د بېلابېلو چارو په پرمخ وړلو کې مهم مسئولیتونه لري

د نصیر احمد فایق ټاکنه په داسې وخت کې ترسره کېږي چې افغانستان لا هم په نړیوالو فورمونو کې د خپل استازیتوب او د نړیوالو اړیکو د پیاوړتیا هڅې روانې ساتلې دي. دا چاره د ملګرو ملتونو په چوکاټ کې د افغانستان د حضور او ونډې لپاره یو مهم پرمختګ بلل کېږي