خام مواد : قزاقستان د صنعتي ودې لپاره له افغانستان او قرغیزستان سره د خامو موادو هوکړې کړې

خام مواد : قزاقستان د صنعتي ودې لپاره له افغانستان او قرغیزستان سره د خامو موادو هوکړې کړې

بریانیوزچهار شنبه - ۲۴ سرطان ١٤٠٥

 د قزاقستان د صنعت او ودانیزو چارو وزیر اعلان کړی چې هېواد یې د فلزي صنعت د اړتیا وړ خامو موادو د تأمین لپاره له افغانستان او قرغیزستان سره هوکړو ته رسېدلی دی

 د راپور له مخې، یرسعین ناګاسپایف د قزاقستان د حکومت په غونډه کې ویلي چې د روان کال په لومړیو شپږو میاشتو کې د دغه هېواد د فلزي صنعت تولید ۹۷.۳ سلنه ثبت شوی دی

هغه ویلي، د تولید په کچه کې لږ بدلون د ځینو صنعتي مرکزونو د پلان شوو ترمیماتو او د کورنیو معدني سرچینو د کمېدو له امله رامنځته شوی، خو د خامو موادو د برابرولو لپاره د نوو اقداماتو په پلي کېدو سره د صنعت وضعیت بېرته ښه شوی دی

د قزاقستان د صنعت وزیر زیاته کړې چې کورنیو تولیدونکو د مسو، جست او سرو زرو د خامو موادو عرضه لوړه کړې او د معدني موادو د انتقال بهیر هم بېرته پیل شوی دی

نوموړي ویلي، له افغانستان او قرغیزستان سره د معدني خامو موادو د واردولو هوکړې د قزاقستان د فلزي صنعت لپاره د دوامدارو سرچینو د برابرولو په موخه شوې دي

ناګاسپایف همدارنګه ویلي چې د قزاقستان تولیدي سکتور د روان کال په لومړۍ نیمایي کې ۹.۸ سلنه وده کړې او دا پرمختګ تر ډېره د نویو صنعتي پروژو او فابریکو د فعالیت له پیل سره تړاو لري

د هغه په وینا، تر اوسه د ۲۵۲ میلیارده ټنګو په ارزښت ۷۴ پانګیزې پروژې بشپړې شوې چې زرګونه کاري فرصتونه یې رامنځته کړي، او حکومت پلان لري چې د کال تر پایه نورې سترې پروژې هم عملي کړي