مقاله

دوحه کې افغان کډوال: د امریکا د انتقال ژمنو ته په تمه یو

اشتراک گذاری:

بریانیوز - پنجشنبه ٢۵ سرطان ١٤٠٥

دوحه – د افغانانو د بیا مېشتېدنې د ملاتړ یوې ادارې ویلي، د امریکا د کانګرس درې غړو په دوحه کې د سیلیه په پنډغالي کې له هغو افغان کورنیو سره خبرې کړې دي چې امریکا ته د انتقال په تمه شپې او ورځې تېروي

دغو افغان کورنیو د خبرو پر مهال ویلي، د سیمې د روانو ترینګلتیاوو او د امریکا او ایران ترمنځ د شخړې له امله د دوی د اوسېدو ځای د احتمالي امنیتي ګواښونو له خطر سره مخ دی

هغوی له امریکايي چارواکو غوښتي چې د افغانانو د انتقال په اړه کړې ژمنې هېرې نه کړي او د دوی د دوسیو د ارزونې او انتقال بهیر ته چټکتیا ورکړي

د امریکا د کانګرس غړو هم ویلي چې د افغان کورنیو اندېښنې به د امریکا د بهرنیو چارو وزیر مارکو روبیو ته ورسوي او د دې ستونزې د حل لپاره به موضوع تعقیب کړي

د معلوماتو له مخې، د دوحې په سیلیه پنډغالي کې شاوخوا ۱۱۰۰ افغانان د امریکا ته د تګ په تمه دي، چې ۱۷ امیندواره ښځې هم پکې شاملې دي. دوی وايي، تر اوسه د امریکا د حکومت له لوري د خپل راتلونکي په اړه روښانه ځواب ته منتظر دي