حبیب الرحمن حکمتیار: د واقعیتونو انکار د جګړو اصلي لامل دی؛ افغانستان هم د همدې ستونزې قرباني دی

د حزب اسلامي مخکش غړی انجینر حبیب الرحمن حکمتیار په خپلو تازه څرګندونو کې، د مشهور تاریخ‌پوه او لیکوال یووال نوح هراري د نظر په استناد ویلي، چې د نړۍ ډېری کورنۍ او نړیوالې شخړې هغه وخت رامنځته کېږي، کله چې یو لوری د مقابل لوري شتون، هویت او واقعیت ونه مني او یا یې په بشپړه توګه له پامه وغورځوي.

بریانیوز- یکشنبه، ٢٨ سرطان ١٤٠٥

هغه ویلي، د تاریخ تجربې ښيي چې د واقعیتونو انکار د سولې پر ځای د جګړو، تاوتریخوالي او اوږدمهالو بحرانونو لامل ګرځي. د نوموړي په وینا، هغه مهال چې یو لوری ځان مطلق برحق او بل لوری بې‌اعتباره وبولي، د تفاهم او سوله‌ییز حل ټولې لارې تړل کېږي.

حکمتیار د بېلګو په توګه ویلي، د اسراییل له لوري د فلسطینیانو د ملي او سیاسي شتون نه‌ منل، په اوکراین کې روانه جګړه، پر ایران د امریکا بریدونه او د خلیج پر هېوادونو د ایران حملې، ټولې هغه بېلګې دي چې د یو بل د واقعیتونو د نه‌ منلو له امله رامنځته شوې دي.

نوموړي د افغانستان روان وضعیت ته په اشارې سره ویلي، د طالبانو له لوري د هغو شخصیتونو، سیاستوالو، رهبرانو او سیاسي ګوندونو نه‌ منل چې د دوی له تګلارې سره مخالف دریځ لري، همدارنګه د ښځو، د نجونو د زده‌کړو او د پرمختللې ټکنالوژۍ پر وړاندې د هغوی چلند، د مقابل لوري د واقعیت د نه‌ منلو څرګندې بېلګې دي.

د هغه په وینا، کله چې یو لوری زیات ځواک او واک په اختیار کې ولري، د دې پر ځای چې واقعیتونه ومني، د اختلافاتو د حل لپاره خبرې او تفاهم ته مخه کړي او د ګډ ژوند زمینه برابره کړي، هڅه کوي مقابل لوری په بشپړه توګه له سیاسي او ټولنیز ډګره حذف کړي، چې پایله یې د جګړو دوام، بې‌ثباتي او د ټولنو ژور وېش وي.

حبیب الرحمن حکمتیار په پای کې هیله څرګنده کړې چې د جګړو او تقابل پر ځای، د ټولو لورو شتون، مشروع حقونه او واقعیتونه ومنل شي. د نوموړي په باور، یوازې د متقابل درناوي، زغم او واقعیت‌پالنې له لارې افغانستان او نړۍ تلپاتې سولې او ثبات ته رسېدای شي، او خلک به نور د جګړو، ناامنۍ او سیاسي فشارونو له امله د خپل وطن پرېښودو او کډوالۍ ته نه اړ کېږي.