د نیمروز خونړۍ پېښه؛ UNHCR: د امنیت او ښه ژوند لپاره باید هېڅوک خپل ژوند قرباني نه کړي

ملګرو ملتونو د نیمروز د خونړۍ پېښې په اړه خبرداری ورکړ: هېڅوک دې د امنیت او ښه ژوند لپاره خپل ژوند له خطر سره نه مخ کوي

بریانیوز- دوشنبه ٢٩ سرطان ١٤٠٥

بریا نیوز – نیمروز: د ملګرو ملتونو د کډوالو عالي کمېشنرۍ (UNHCR) په نیمروز ولایت کې د قاچاقي سفر پر مهال د پنځو افغانانو د مړینې له پېښې وروسته خبرداری ورکړی چې هېڅوک باید د امنیت او د ښه ژوند د موندلو لپاره خپل ژوند په خطرناکو او ناقانونه سفرونو کې له خطر سره مخ نه کړي.

دې ادارې په یوه خبرپاڼه کې د پېښې له قربانیانو سره خواخوږي څرګنده کړې او ویلي یې دي چې د هغو ۱۴ نورو کسانو د موندلو هڅې لا هم روانې دي، چې د همدې پېښې پر مهال ورک شوي دي.

د UNHCR په وینا، دا غمجنه پېښه د ناقانونه او خطرناکو سفرونو د درنې انساني بیې څرګندونه کوي او نړۍ ته دا پیغام ورکوي چې خلکو ته باید د ملاتړ، د ژوند د ښه کېدو او خوندي، قانوني کډوالۍ فرصتونه برابر شي، څو اړ نه شي خپل ژوند په داسې خطرناکو لارو کې واچوي.

دی ادارې زیاته کړې چې د خپلو همکارو بنسټونو په مرسته په سیمه کې حضور لري او د قربانیانو له کورنیو سره بشري مرستې کوي.

د راپورونو له مخې، شاوخوا اته ورځې وړاندې له زرنج ښار څخه یو موټر، چې له ۱۹ څخه تر ۲۱ کسانو یې لېږدول، د ایران پر لور روان شوی و، خو د نیمروز د چهاربرجک ولسوالۍ په دښت مارګو کې د شګو له سخت توپان، سختې ګرمۍ او د موټر د خرابېدو له امله مسافر بند پاتې شول.

د نیمروز د امنیې قوماندانۍ ویاند، ګل‌محمد قدرت، پېښه تایید کړې او ویلي یې دي چې یاد کسان د سختو اقلیمي شرایطو، تندې او د لارې د ستونزو له امله خپل ژوند له لاسه ورکړی دی.

ځايي سرچینې وایي، موټر څو ځله د شګو په غونډیو کې بند پاتې شوی و. تر اوسه د پنځو کسانو جسدونه موندل شوي، خو د ۱۴ نورو کسانو برخلیک لا هم نه دی معلوم.

د سرچینو په وینا، د مړو شویو کسانو یو شمېر د بلخ ولایت او یو شمېر د بادغیس ولایت د غورماچ ولسوالۍ اوسېدونکي وو.

په ټولنیزو رسنیو خپرې شوې انځورونه ښيي چې د قربانیانو جسدونه د دښت مارګو په شګلنو سیمو کې پراته وو او ځینې یې تر شګو لاندې شوي وو.

کارپوهان او بشري بنسټونه وایي، د افغانستان او ایران ترمنځ د نیمروز قاچاقي لارې لا هم د کډوالو لپاره له تر ټولو خطرناکو لارو څخه ګڼل کېږي، چې هر کال پکې ګڼ افغانان د تندې، ګرمۍ، ورکېدو، د قاچاقبرو د ناوړه چلند او نورو پېښو له امله خپل ژوند له لاسه ورکوي.