پاریس: فرانسه د ۱۵ کلونو څخه کم عمره ماشومانو لپاره پر ټولنیزو رسنیو قانوني محدودیت ولګاوه

پاریس: فرانسه د ۱۵ کلونو څخه کم عمره ماشومانو لپاره پر ټولنیزو رسنیو قانوني محدودیت ولګاوه

بریانیوز- چهارشنبه ۳۱ سرطان ١٤٠٥

پاریس – د فرانسې پارلمان هغه قانون تصویب کړ چې له مخې به یې د ۱۵ کلونو څخه کم عمره ماشومان او تنکي ځوانان نور د ټولنیزو رسنیو نوي حسابونه نه شي جوړولی. په دې سره فرانسه د اروپا لومړنی هېواد شو چې د ماشومانو لپاره یې پر ټولنیزو شبکو داسې قانوني محدودیت نافذ کړ

دا قانون، چې د ولسمشر امانویل مکرون له مهمو ټاکنیزو ژمنو څخه و، د ملي شورا له خوا د ۲۷۹ موافقو او ۸۱ مخالفو رایو په ترلاسه کولو تصویب شو. مکرون د قانون له تصویب وروسته وویل، د ماشومانو د خوندیتوب په برخه کې فرانسه په اروپا کې مخکښ ګام پورته کړی دی

د قانون له مخې، د ۲۰۲۶ کال د سپټمبر له لومړۍ نېټې به له ۱۵ کلونو څخه کم عمره کسان د ټولنیزو رسنیو نوي حسابونه نه شي پرانیستلای. همدارنګه، د ۲۰۲۷ کال د جنورۍ له لومړۍ نېټې به د یاد عمر لرونکو کسانو پخواني حسابونه هم غیرفعاله شي، مګر که د قانون له شرایطو سره سم نه وي

د قانون له مخې، د ټولنیزو رسنیو شرکتونه مکلف دي چې د کاروونکو د عمر د تایید لپاره اغېزمن او باوري سیستمونه جوړ کړي. په عین حال کې، د ماشومانو او د هغوی د کورنیو پر وړاندې د جریمې کومه ماده نه ده شامله شوې

د فرانسې حکومت وایي، د دې قانون اساسي موخه د ماشومانو او تنکیو ځوانانو رواني، ټولنیز او فکري خوندیتوب دی، ځکه په وروستیو کلونو کې د ټولنیزو رسنیو د ناوړه اغېزو په اړه اندېښنې په پرله‌پسې ډول زیاتې شوې دي