سیاست

د کورنیو چارو وزارت: هېڅ ګاونډي هېواد له افغانستانه د ګواښ په اړه اسناد نه دي وړاندې کړي

اشتراک گذاری:

بریانیوز دوشنبه ( ۹/ سنبله /۱۴۰۵هـ.ش)

کابل — د طالبانو د کورنیو چارو وزارت وايي، تر اوسه هېڅ یوه ګاونډي هېواد کابل ته داسې معتبر اسناد نه دي سپارلي چې وښيي د افغانستان له خاورې د دوی پر وړاندې امنیتي ګواښونه ترسره کېږي

د دغه وزارت چارواکي د ګاونډیو هېوادونو هغه اندېښنې ردوي چې ګواکې د افغانستان خاوره د هغوی پر وړاندې د وسله‌والو فعالیتونو لپاره کارول کېږي. د وزارت په وینا، که کوم هېواد د دې ادعاوو په اړه اسناد او شواهد ولري، باید له کابل سره یې شریک کړي

د کورنیو چارو وزارت ټینګار کړی چې د افغانستان خاوره به د هېڅ هېواد پر ضد د فعالیتونو لپاره ونه کارول شي او د سیمې له هېوادونو سره د امنیتي ستونزو د حل لپاره د خبرو او همکاریو غوښتونکی دی

د طالبانو د حکومت دغه څرګندونې په داسې حال کې دي چې د افغانستان ځینې ګاونډي هېوادونه له دې هېواده د امنیتي ګواښونو په اړه اندېښنې څرګندوي او پر کابل د وسله‌والو ډلو د فعالیتونو د مخنیوي غوښتنه کوي

په ورته وخت کې، د کابل حکومت تل ټینګار کړی چې د افغانستان له خاورې د نورو هېوادونو پر وړاندې د ګواښونو اجازه نه ورکوي او له ګاونډیو هېوادونو غواړي چې خپلې امنیتي اندېښنې د مستقیمو خبرو له لارې حل کړي