کاناډا خپلو وګړو ته: افغانستان ته له هر ډول سفر څخه ډډه وکړئ

اشتراک گذاری:

د کاناډا حکومت خپلو اتباعو ته یو ځل بیا سپارښتنه کړې چې افغانستان ته له هر ډول سفر څخه ډډه وکړي او د دغه هېواد امنیتي وضعیت یې «ډېر بې‌ثباته او خطرناک» بللی دی.

بریانیوز- پنجشنبه، ١٢ سنبله ١٤٠٥

د کاناډا د سفر په تازه لارښود کې ویل شوي چې په افغانستان کې د ترهګریزو بریدونو، روانې ناامنۍ، انسان‌تښتونې، خپلسرو نیونو او توقیفونو جدي خطر موجود دی.

د کاناډا حکومت خبرداری ورکړی چې بهرني وګړي او له لوېدیځو هېوادونو سره تړلي کسان د ترهګرو ډلو له لوري د انسان‌تښتونې او تاوتریخوالي له لوړ خطر سره مخ دي. دغه راز بهرني اتباع، په ځانګړي ډول خبریالان او بشري کارکوونکي، د خپلسرو نیونو له خطر سره هم مخ کېدای شي.

د دغه هېواد په وینا، ترهګرې ډلې لا هم په افغانستان کې فعالې دي او بریدونه ښايي هر وخت، د کابل په ګډون په لویو ښارونو کې هم، ترسره شي.