نشنل انټرسټ: د افغانستان له ثبات پرته د منځنۍ اسیا په اړه د امریکا ستراتیژي له ستونزو سره مخ کېږي

نشنل انټرسټ: د افغانستان له ثبات پرته د منځنۍ اسیا په اړه د امریکا ستراتیژي له ستونزو سره مخ کېږي

(بریانیوز دو شنبه (۴/ عـقـرب/۱۴۰۵هـ.ش

امریکايي خپرونې «نشنل انټرسټ» په یوه تحلیلي مقاله کې لیکلي چې له منځنۍ اسیا سره د اقتصادي او ستراتیژیکو اړیکو د پراختیا لپاره د امریکا هڅې به د افغانستان د روان سیاسي او امنیتي وضعیت له حل پرته له جدي ننګونو سره مخ شي

په مقاله کې، چې د «منځنۍ اسیا په اړه د امریکا ستراتیژي د افغانستان له ستونزې سره مخ ده» تر سرلیک لاندې خپره شوې، راغلي چې د امریکا د بهرنیو چارو وزیر مارکو روبیو ازبکستان ته سفر او د منځنۍ اسیا د پنځو هېوادونو له استازو سره د «سي ۵+۱» په چوکاټ کې لیدنه، له دغې سیمې سره د واشنګټن د بیا زیاتېدونکې لېوالتیا څرګندونه کوي

د مقالې له مخې، امریکا هڅه کوي له منځنۍ اسیا سره په سوداګرۍ، پانګونې، کانونو، انرژۍ او ترانزیټي لارو کې همکاري پراخه کړي. خو د ترهګرۍ، د نشه‌يي توکو د قاچاق او د پولو د ناامنۍ په څېر اندېښنې ښايي د دغو موخو د پلي کېدو پر وړاندې خنډونه رامنځته کړي

نشنل انټرسټ ټینګار کړی چې د افغانستان ثبات او د منځنۍ اسیا اقتصادي پرمختګ له یو بل سره نږدې تړاو لري او د سیمې د هېوادونو ترمنځ د اقتصادي همکاریو پراختیا د افغانستان له وضعیت څخه جلا نه شي ارزول کېدای

د مقالې په تحلیل کې په ځانګړې توګه د انرژۍ د لېږد لویو پروژو او د منځنۍ اسیا او جنوبي اسیا ترمنځ د سوداګریزو لارو پر اهمیت ټینګار شوی دی. د دغو پروژو بریالیتوب تر یوه حده د افغانستان په امنیتي وضعیت، سیاسي ثبات او د ترانزیټي لارو په خوندي ساتلو پورې تړلی بلل شوی دی

د دې تحلیل اساسي پیغام دا دی چې که واشنګټن غواړي له منځنۍ اسیا سره خپلې اقتصادي او ستراتیژیکې اړیکې پراخې کړي، نو د افغانستان سیاسي او امنیتي وضعیت به هم د خپلې سیمه‌ییزې ستراتیژۍ یوه مهمه برخه وګرځوي