په ملګرو ملتونو د جوړېدو په ۸۰م تلین؛ یوناما له نړۍ وغوښتل چې د افغانستان حالت ته جدي پاملرنه وکړي

کابل – د جمعې په ورځ (د اکتوبر ۲۴مه) چې د ملګرو ملتونو د ورځې او د دې نړیوال سازمان د ۸۰مې کلیزې سره برابره ده، د افغانستان لپاره د ملګرو ملتونو د مرستندوی دفتر (یوناما) له نړیوالې ټولنې وغوښتل چې د افغان ولس د نه ختمېدونکو کړاوونو او بشري ناورین پر وړاندې خپلې هڅې زیاتې کړي

د ملګرو ملتونو عمومي منشي انتونیو ګوترش په دې مناسبت خپره شوې اعلامیه کې ویلي، چې دا سازمان په تېرو اتیا کلونو کې د سولې د ټينګښت، د فقر او لوږې پر وړاندې د مبارزې، د بشري حقونو د ودې او د یو پایداره نړۍ د جوړولو لپاره هڅې کړې دي

ښاغلي ګوترش زیاته کړې:

«نن ورځ، تر هر بل وخت زیات، نړۍ ګډو ارادې او ژمنې ته اړتیا لري. هغه ننګونې چې بشریت ورسره مخ دی، هېڅ هېواد نه شي کولای یوازې حل یې کړي؛ دا یوازې د ګډو هڅو په مټ ممکن دي

په همدې مهال، یوناما په خپل پیغام کې ټینګار کړی چې د افغانستان د خلکو ترڅنګ د یو دوامدار او باور وړ شریک په توګه پاتې کېږي. دغه دفتر ویلي، سره له ټولو ننګونو، د افغانانو ملاتړ د دوی د نړیوال ماموریت یوه مهمه برخه ده

افغانستان لا هم له سختو اقتصادي او بشري ستونزو سره مخ دی، خو ملګري ملتونه د افغان ولس د مرستې، هوساینې او باعزته ژوند لپاره ژمن دي

د یادونې وړ ده چې د ملګرو ملتونو سازمان د دوهمې نړیوالې جګړې وروسته، د ۱۹۴۵ کال د اکتوبر په ۲۴مه نېټه د سولې او نړیوال عدالت د ټينګښت په موخه جوړ شو، او تر نن ورځې یې د نړۍ د بېلابېلو بحرانونو په مهارولو او د ملتونو ترمنځ د همغږۍ په رامنځته کولو کې مهم رول لوبولی دی

 اوس، د ملګرو ملتونو د اتیا کلنې تجربې وروسته، افغانستان یو ځل بیا د نړۍ له هغو هېوادونو څخه دی چې د دې سازمان له دوامدارې پاملرنې او همکارۍ پرته یې راتلونکی له بې‌باورۍ او کړاو ډک ښکاري