په استانبول کې د افغانستان او پاکستان د خبرو دويم پړاو پيل شو – د اميد او اندېښنې تر منځ نوې هڅه

استانبول (شنبې، د اکتوبر ۲۵مه) – د اوږدې شخړې او تريخ سياسي فضا وروسته، د افغانستان او پاکستان ترمنځ د دوهم پړاو مذاکرات نن د ترکيې په ښکلي ښار استانبول کې پيل شول. دا خبرې د هغو تفاهمي هڅو دوام دی چې څو ورځې وړاندې په قطر، دوحه کې د دواړو خواوو ترمنځ تر يوې لنډې هوکړې وروسته پيل شوې وې

د طالبانو حکومت ويلي، چې د افغانستان له لوري يو لوړپوړی پلاوی دغه خبرو ته استول شوی، څو د سياسي، امنيتي او اقتصادي ستونزو د حل په موخه د پاکستاني استازو سره مخامخ خبرې وکړي

د پاکستان دفاع وزير خواجه اصف، چې تېره ورځ په سیالکوټ کې له رسنيو سره خبرې کولې، څرګنده کړه

دوست هېوادونه قطر او ترکیه په ډېر صداقت او رغنده نيت سره هڅه کوي، چې د دواړو ګاونډيانو ترمنځ شخړې د خبرو له لارې پای ته ورسېږي

خو نوموړي په يو ټينګ غږ دا هم وويل، که د خبرو له لارې د ستونزو حل ممکن نه شي، نو "له افغانستان سره زموږ ښکاره جګړه ده." دا څرګندونې د سيمې د حالاتو د نازکوالي يو څرګند انځور وړاندې کوي

شنونکي باور لري، چې دا خبرې کولای شي د دواړو هېوادونو ترمنځ د باور يو نوی باب پرانیزي، خو که د زړو لانجو د حل لپاره عملي ګامونه پورته نه شي، ښايي د تاوتريخوالي څپه بيا هم راژوندۍ شي.

ترکيه، چې د اسلامي نړۍ يو مهم سياسي محور بلل کېږي، هڅه کوي د منځګړتوب له لارې د افغانستان او پاکستان ترمنځ د اعتماد فضا رامنځته کړي

د سيمه ييزو سرچينو په وينا، تمه ده چې د استانبول د خبرو په اجنډا کې د پولو امنيت، د ترهګرۍ اندېښنې، سوداګري، کډوال، او د ترانزيټي لارې پرانېستل شامل وي

که څه هم د دواړو هېوادونو ترمنځ د بې باورۍ ژور دیوالونه لا هم پر ځای دي، خو دا هڅې د يوې نوې هيلې څرک ګڼل کېږي — هيله دا چې يو وخت به اسلام‌اباد او کابل د رقابت پر ځای د همکارۍ پر لور لاړ شي