هند باید تل د جګړې د تیارسۍ حالت کې وي – د راجنات سنګ تازه خبرداری

د هند د دفاع وزیر راجنات سنګ د خپلې نوې وینا پر مهال یو ځل بیا د هېواد د دفاعي ځواک د لا پیاوړتیا او چمتووالي ټینګار کړی دی. هغه ویلي، هند باید هېڅکله هم د جګړې د احتمالي خطرونو په وړاندې بې‌پروا پاتې نه شي، ځکه د نړۍ روان وضعیت ښيي چې هره شېبه ناڅاپي بحران رامنځته کېدای شي.

سنګ زیاته کړې، د مې میاشت کې له پاکستان سره څلور ورځنۍ جګړه د دې څرګند ثبوت دی، چې د جګړې اور کولای شي هر وخت بل شي او هېڅ هېواد باید د ارامۍ په خوب ونه ویده شي

نوموړي په خپلو څرګندونو کې ټینګار وکړ، چې هند به یوازې هغه وخت د سیمې او نړۍ په کچه خپل وقار وساتي، که د خپل کورني دفاعي سیستم بنسټونه لا پیاوړي کړي او د پوځ د عصري کولو لړۍ نوره هم چټکه کړي

د دفاع وزیر په وینا، هېوادونه چې د امنیت او دفاع په برخه کې ځانونه کمزوري پرېږدي، د دښمن د ناڅاپي بریدونو تر ټولو اسانه هدف ګرځي. هغه وویل: «موږ باید تل د جګړې د حالت لپاره چمتو واوسو، ځکه سولې ته د لارې ساتنه هم له ځواک څخه تېرېږي

شنونکي وایي، د راجنات سنګ دا څرګندونې په داسې مهال راځي، چې د هند او پاکستان اړیکې یو ځل بیا د سرحدي ترینګلتیا له امله تر سیوري لاندې راغلي دي

هندي پوځ هم په وروستیو کې د نوې وسلې او ټکنالوژۍ د رامنځته کولو اعلان کړی، چې موخه یې د هېواد د دفاعي دیوال لا پیاوړتیا ښودل شوې ده

په ټوله کې، د راجنات سنګ دا پیغام یو جدي یادونه ګڼل کېږي، چې هند غواړي نه یوازې د جګړې لپاره بلکې د سولې د خوندي ساتلو لپاره هم د ځواک په ډګر کې برلاسی پاتې شي