اخبار جهان

د طالبانو د مالیې وزارت: له پاکستان سره د سوداګرۍ بندیز د افغانستان پر اقتصاد هېڅ اغېز نه دی کړی

اشتراک گذاری:

د طالبانو د حکومت د مالیې وزارت وایي چې له پاکستان سره د سوداګرۍ درېدلو د افغانستان پر اقتصاد او عوایدو هېڅ منفي اغېز نه دی کړی. دا څرګندونې په داسې حال کې کیږي چې د دواړو هېوادونو ترمنځ د وروستیو سیاسي او امنیتي ترینګلتیاوو له امله سوداګريز تګ راتګ ځنډېدلی دی

په یوه خپره شوې خبرپاڼه کې، وزارت مالیه ټینګار کړی چې د سوداګرۍ اړیکو پرې کېدل د افغانستان د سیمه‌ییزو او نړیوالو اقتصادي لارو پر مخ هېڅ خنډ نه دي جوړ کړي او هېواد له نورو نړیوالو بازارونو سره خپلې راکړې ورکړې په عادي توګه ترسره کوي. د وزارت په وینا، د افغانستان صادرات او واردات په نورو لارو روان دي او هېڅ ستونزه نه ده رامنځته شوې

د مالیې وزارت زیاتوي چې د ګمرکي عوایدو کچه هم راټیټه شوې نه ده او سوداګریز فعالیتونه په همدې شدت دوام لري. چارواکي وایي چې د بدیلو لارو موندلو هڅې یې ګړندۍ کړي او له داخلي او بهرنيو تاجرانو غواړي چې له دغو بدیلو لارو استفاده وکړي

شنونکي بیا باور لري چې د پاکستان له لارې د سوداګرۍ بندېدل د افغانستان پر بازارونو او بیو اغېز کولی شي، خو د طالبانو د حکومت رسمي دریځ بیا دا دی چې د اقتصاد بهیر متوازن دی او د ستونزو د راټوکیدو مخنیوی شوی دی

تر اوسه د پاکستان حکومت د طالبانو د مالیې وزارت د څرګندونو په اړه کوم رسمي غبرګون نه دی ښودلی