کابل – د ژمي له خپرېدو سره د افغان کډوالو ستونزې زیاتېږي؛ طالبان د ملګرو ملتونو د مرستو د پراخېدو غوښتنه کوي

 د طالبانو د کډوالو او بېرته راستنېدونکو چارو وزیر عبدالکبیر د ملګرو ملتونو د انکشافي برنامې له مرستیالې شوکو نودا سره په تازه لیدنه کې ویلي چې د افغان کډوالو وضعیت په ګاونډیو هېوادونو کې د جدي اندېښنې وړ حالت ته رسېدلی دی

د کډوالو وزارت د چهارشنبې په ورځ، د قوس په ۵مه، په خپره شوې خبرپاڼه کې لیکلي چې دواړو لورو د هغو افغانانو د حالاتو په اړه تبادله‌نظر کړې چې له پاکستان، ایران او نورو هېوادونو بېرته افغانستان ته ستنېږي او لا هم د بنسټیزو خدماتو له کمښت او اقتصادي سختیو سره مخ دي. په خبرپاڼه کې راغلي چې دواړو خواوو د دې اړتیا پر اهمیت ټینګار کړی چې باید د کډوالو د ملاتړ لپاره دایمي او عملي حللارې وموندل شي

عبدالکبیر په دې لیدنه کې ویلي چې د ژمي په راتګ سره د بېرته راستنېدونکو کډوالو ستونزې څو چنده شوې دي. د ده په وینا، په سرحدي سیمو کې د سرپنا، خوراکي توکو، تودو جامو او اساسي صحي خدماتو کمبود د زرګونو کورنیو ژوند له خطر سره مخ کړی دی

هغه زیاته کړې چې افغانستان د یوې سترې بشري غمیزې له خطر سره مخ دی او د ملګرو ملتونو مرستو ته بېړنۍ اړتیا شته. د وزارت په وینا، طالبان له نړیوالو بنسټونو غواړي چې د کډوالو لپاره د مرستو اندازه پراخه کړي او د هغو پروګرامونو ملاتړ زیات کړي چې کولای شي بېرته راستنېدونکو ته د اوږدمهاله ثبات او اقتصادي ځان بسیاینې زمینه برابره کړي

د څارونکو په باور، د کډوالو مدیریت د افغانستان د روانو انساني بحرانونو له مهمو او پیچلو مسایلو څخه دی، او د ژمي سړې څپې به د دغو کورنیو د ژوند حالت لا پسې کړکېچن کړي که نړیواله مرستې په وخت او په کافي اندازه ونه رسېږي