له پاکستانه د مهاجرینو د ایستلو دوام؛ په یوه ورځ کې ۸۷۹ کورنۍ افغانستان ته ستنې شوې

د افغان مهاجرینو د جبري اخراج څپه له پاکستانه ورځ تر بلې پراخېږي او زرګونه افغانان د سختو شرایطو له امله بېرته خپل هېواد ته ستنېږي. د طالبانو د مهاجرینو د ستونزو د هوارۍ کمیسیون تازه اعلان کړی چې یوازې پرون په یوه ورځ کې ۸۷۹ افغانې کورنۍ له سیمې هېوادونو، په ځانګړي ډول له پاکستانه، افغانستان ته راستانه شوې دي

د چارواکو په وینا، دا لړۍ په داسې مهال چټکېږي چې د پاکستان حکومت په وروستیو اوونیو کې د افغان کډوالو د جبري ایستلو سیاست لا تېز کړی او د هغوی د نیولو، بندیولو او ایستلو چارې په بې‌ساري ډول روانې دي. یوازې دوه ورځې مخکې نږدې ۲ زره نورې کورنۍ هم اړ شوې چې خپلې اوږدمهالې میشت‌ځای پرېږدي او افغانستان ته بېرته راستانه شي

له بل پلوه، د ملګرو ملتونو د کډوالو عالي کمېسارۍ (UNHCR) او د نړیوالې کډوالۍ سازمان (IOM) په یوه ګډ راپور کې خبرداری ورکړی چې د سیاسي فشارونو، امنیتي اندېښنو او د کډوالو پر وړاندې د سخت دریځ له امله د افغان مهاجرینو جبري ستنېدنه په حیرانوونکي ډول لوړه شوې ده

افغان کورنۍ چې د کلونو راهیسې په پاکستان کې اوسېدلې، اوس په ناڅاپي او ستړي کوونکي حالت کې، بې له دې چې د ژوند لومړني اړتیاوې ولري، خپل هېواد ته ستنېږي. د مرستو نړیوالې ادارې ټینګار کوي چې د راستانه شویو کورنیو لپاره بېړنۍ سرپناه، روغتیايي پاملرنه او خوراکي مرستې باید ژر برابرې شي، ځکه د ژمي سړې هوا د هغوی ژوند له جدي ګواښ سره مخامخ کوي

دا په داسې حال کې ده چې د افغانستان اقتصادي شرایط محدود، کاري فرصتونه کم او د اړینو خدمتونو د کمښت ستونزې لا هم پر ځای پاتې دي؛ هغه موضوع چې د ستنېدونکو کورنیو راتلونکی یې اندېښمن کړی دی