اخبار جهان

په اسلام‌اباد کې د چاودنې په تړاو د پاکستان تازه ادعاوې طالبان افغان او پاکستاني یې تورن کړي

اشتراک گذاری:

د پاکستان د اطلاعاتو وزیر، عطاالله تارر، ادعا کړې چې د اسلام‌اباد وروستۍ خونړۍ چاودنه د یوه افغان تبعه له‌خوا ترسره شوې او دا برید د افغانستان طالبانو او د تحریک طالبان پاکستان (TTP) په همکارۍ پلان او عملي شوی دی

تارر ویلي، امنیتي ادارو څلور کسان د دې پېښې په تړاو نیولي او له ډلې یې یو کس اعتراف کړی چې بریدګر د افغانستان له خاورې رااوښتی او هلته ورته د برید روزنه ورکړل شوې وه. د ده په وینا، د دغې حملې د طرحې، همغږۍ او د عاملینو د پناه‌ ورکولو ځایونه ټول د افغانستان په خاوره کې تنظیم شوي دي

هغه ټینګار کړی چې په دې پېښه کې هغه کسان هم ښکېل دي چې په افغانستان کې ځای پر ځای شوي او د پاکستان پر ضد د عملیاتو ملاتړ کوي

پاکستاني چارواکي د وروستیو میاشتو پر مهال څو ځله دا ډول ادعاوې مطرح کړي، خو طالبانو تل ویلي چې د نورو هېوادونو د امنیت د ګډوډۍ لپاره د افغانستان خاوره نه پرېږدي

د پېښې د دقیقو جزییاتو او د نیول شویو کسانو هویت لا هم په بشپړ ډول نه دی څرګند شوی، خو د اسلام‌اباد امنیتي وضعیت له دې برید وروسته نور هم تر پوښتنې لاندې راغلی دی