اروپا په اوکراین مذاکراتو کې “هیڅ ځای نه لري” — د روسیې توند دریځ

مسکو – د روسیې د بهرنیو چارو وزارت مرستیال سرګي ریابکوف اعلان کړی چې مسکو د اوکراین د جګړې په اړه په راتلونکو مذاکراتو کې اروپا ته هېڅ رول نه ور پېژني. د ریابکوف دا څرګندونې د اروپا د پخوانیو منځګړیتوب هڅو او د اوسني سیاسي وضعیت په تړاو د روسیې د نیوکې یوه بله نښه بلل شوې ده

اروپا د باور وړ نه دی؟

ریابکوف وویل چې د اروپا د تېرو تجربو په ځانګړي ډول د منځګړیتوب له ناکامو هڅو وروسته، مسکو اوس اروپا د باور وړ منځګړي نه بولي. هغه زیاته کړه چې د اروپا وروستۍ کړنې او د روسیې پر ضد دریځونه دا ناشونې کوي چې په مذاکراتو کې ورته مشروع او اغېزمن ځای تصور شي

د روسیې بدلون موندلې دیپلوماتیکه نقشه

د روسیې د بهرنیو سیاست څارونکي وايي چې دغه څرګندونې ښيي مسکو هڅه کوي د اوکراین د جګړې تړونونه یوازې د هغو هېوادونو له لارې تنظیم کړي چې د روسیې له نظره “متوازن، بې‌طرفه او د اعتماد وړ” دي – لکه چین، هند یا د منځني ختیځ ځینې هېوادونه

اروپا: د روسیې قضاوت غیر واقعي دی

اروپایي چارواکو تراوسه په رسمي ډول د ریابکوف په څرګندونو غبرګون نه دی ښودلی، خو اروپایي ډیپلوماټان په تېرو مواردو کې ټینګار کړی و چې اروپا د جګړې قرباني ده، د اوکراین مهم ملاتړ کوونکی دی او د سولې هره هڅه کې د دې قاره رول “نه‌بدلېدونکی” دی

راتلوونکي مذاکرات: د چا په منځګړیتوب؟

له دې سره، د اوکراین جګړه یو ځل بیا د لویو نړیوالو ځواکونو د سیالۍ په ډګر بدل شوې. که د روسیې دریځ همداسې پاتې شي، تمه کېږي چې راتلونکې احتمالي خبرې اترې به د اروپا له لوري نه، بلکې د بدیلو قدرتونو له خوا تنظیم شي