تهران – د ایران د اسلامي جمهوریت مشر آیت‌الله خامنه‌ ای وایي امریکا او اسراییل په وروستیو ۱۲-ورځنۍ جګړه کې پاتې راغلي

تهران – د ایران د اسلامي جمهوریت مشر آیت‌الله سیدعلي خامنه‌ای په یوه تلویزیوني وینا کې ادعا وکړه چې په «۱۲ ورځنۍ جګړه» کې امریکا او اسراییل خپلو ټاکل شوو هدفونو ته نه دي رسېدلي او د دوی «نظامي او استخباراتي محاسبې» ناکامې شوې دي

د خامنه‌ ای په وینا، د جګړې د شدت باوجود ایران له خپل دفاعي دریځه نه دی شا ته شوی او د ده په تعبیر، د هېواد د مقاومت اراده د فشارونو له کبله نه ده کمزورې شوې

هغه وویل چې په دې حساسو شېبو کې حتی ځینې داخلي منتقدان هم د نظام ملاتړ ته ولاړ شوي، چې د ده په باور «د ملي یووالي نښه ده

د امریکا سره د اړیکو ردول

خامنه‌ای په خپلو څرګندونو کې یو ځل بیا د واشنګټن سره د اړیکو رغولو امکان رد کړ. هغه ټینګار وکړ چې د امریکا سره اړیکې نه منل کېږي

او ایران هېڅکله د دې لپاره ابتکار نه کوي. نوموړي د هغو راپورونو په اړه هم غبرګون وښود چې ګواکې ایران د یوه منځګړي هېواد له لارې امریکا ته پیغام استولی دی. هغه دا ادعاوې بشپړ رد کړې او ویې ویل چې «چل او شایعات د دښمن دسيسې دي

شنونکي: داخلي او خارجي پیغام یو ځای هدف لري

سیاسي شنونکي په دې باور دي چې د خامنه‌ای دا څرګندونې دوه پیغامونه لري: یو د هېواد په داخل کې د سیاسي فضا کنټرول او بل د نړۍوال فشار پر وړاندې د مقاومت څرګندول. د دوی په وینا، د جګړې په تړاو د ناکامۍ په اړه د خامنه‌ای ادعاوې ښايي د ایران د سیمې د تګلارې د توجیه لپاره کارول کېږي.

راتلونکې څه ډول ښکاري؟

د جګړې د دوام او سیمه‌ییزو تنشونو د زیاتېدو احتمال په پام کې نیولو سره، د ایران او لوېدیځ اړیکې لا پېچلې پاتې دي. تهران ټینګار کوي چې د فشار سیاست به د دوی دریځ نه بدلوي، خو لوېدیځ هېوادونه وایي د ایران سیمه‌ییز فعالیتونه د ثبات لپاره ستر ګواښ دی