اوچا: پر ښځینه کارکوونکو محدودیتونه په افغانستان کې د بشري مرستو رسونه له خنډونو سره مخ کړې

اوچا: پر ښځینه کارکوونکو محدودیتونه په افغانستان کې د بشري مرستو رسونه له خنډونو سره مخ کړې

(بریانیو ز دو شنبه (۴/ عـقـرب/۱۴۰۵هـ.ش

د ملګرو ملتونو د بشري مرستو د همغږۍ دفتر (اوچا) وايي، پر ښځینه مرستندویه کارکوونکو محدودیتونه او د بشري مرستو په چارو کې لاسوهنې په افغانستان کې اړمنو خلکو ته د مرستو رسولو بهیر له جدي ستونزو سره مخ کړی دی

اوچا د خپل تازه راپور له مخې ویلي، چې د ۲۰۲۶ کال په سپټمبر میاشت کې په افغانستان کې د بشري مرستو د لاسرسي په تړاو ۳۰ پېښې ثبت شوې دي دا شمېره د اګست میاشتې په پرتله ۲۷ سلنه کمه ده؛ خو دغه دفتر خبرداری ورکوي چې د ثبت شویو پېښو کمښت حتمي نه ده چې د وضعیت د ښه کېدو معنا ولري، ځکه ځینې پېښې ښايي راپور شوې نه وي. اوچا ټینګار کړی چې د ښځینه کارکوونکو پر فعالیتونو محدودیتونه په ځانګړې توګه د ښځو او نجونو لپاره د مرستو او اړینو خدمتونو ترلاسه کول ستونزمنوي؛ ځکه ښځینه کارکوونکې د اړمنو ښځو د وضعیت په ارزونه، له هغوی سره په اړیکه او د مرستو په رسولو کې مهم رول لري

د دغه دفتر د معلوماتو له مخې، په افغانستان کې په څلورو ولسوالیو کې د بشري مرستو لاسرسی له سختو محدودیتونو سره مخ دی. اداري لاسوهنې، د مرستو د پروګرامونو په چارو کې مداخلې او پر ښځینه کارکوونکو او مرستې ترلاسه کوونکو ښځو محدودیتونه د دې وضعیت له مهمو لاملونو څخه دي

د ملګرو ملتونو دغه اداره له اړوندو خواوو غواړي چې د بشري مرستو د رسولو لپاره د فعالیتونو خنډونه لرې کړي، څو اړمنې کورنۍ، په ځانګړې توګه ښځې او ماشومان، له اړینو مرستو او خدمتونو بې‌برخې نه شي