د هوا د ککړتیا زیاتوالی؛ د کابل ښاریانو مخ پر زیاتېدونکې اندېښنې

د ژمي له رارسېدو سره سم، د کابل ولایت یو شمېر اوسېدونکي د هوا د ککړتیا د بې‌ساري زیاتوالي له امله ژوره اندېښنه څرګندوي. دوی وایي چې د هوا ککړتیا، په ځانګړي ډول د مازدیګر له ساعتونو وروسته، تر ټولو لوړې کچې ته رسېږي او دا حالت د دې لامل شوی چې ډېر خلک خپلې ورځنۍ چارې او کارونه وځنډوي

د کابل ښاریان زیاتوي چې د ژمي په موسم کې د سون توکو بې‌نظمه کارونه، د زاړه موټرو لوګي، د فابریکو او کوچنیو بټیو فعالیتونه، او د شنو سیمو کمښت د هوا د ککړتیا اصلي لاملونه دي. د دوی په وینا، کله ناکله ښار د لوګي په داسې تور کمربند کې نغښتی وي چې ساه اخیستل هم ستونزمن شي

 روغتیايي کارپوهان خبرداری ورکوي چې د هوا دوامداره ککړتیا د تنفسي ناروغیو، د سترګو سوځېدو، د زړه د ناروغیو او نورو جدي روغتیايي ستونزو د زیاتوالي سبب ګرځي. د کابل یو شمېر اوسېدونکي وایي چې په دې وروستیو ورځو کې د ټوخې، ساه لنډۍ او الرژۍ پېښې ډېرې شوې دي، او ماشومان او زاړه کسان تر ټولو ډېر اغېزمن کېږي

د ښار اوسېدونکي له مسوولو ادارو غواړي چې د هوا د ککړتیا د کنټرول لپاره جدي او عملي ګامونه پورته کړي، د سون توکو پر کیفیت څارنه زیاته کړي، د ښار د شنو ساحو پراختیا ته پاملرنه وکړي او عامه پوهاوی لوړ کړي. د دوی په باور، که پر وخت اقدام ونه شي، د هوا ککړتیا به د کابل د خلکو پر روغتیا او ورځني ژوند لا پسې ناوړه اغېزې ولري

سره له دې ستونزو، ښاریان هیله لري چې د ګډو هڅو، اغېزمنو تګلارو او د خلکو د همکارۍ له لارې به کابل یو ځل بیا د پاکې هوا ساه واخلي او د ژوند چاپېریال به خوندي شي