مسکو روسیه: لوېدیځ د افریقا وسلوالې ډلې زموږ پر ضد کاروي؛ د نړیوال امنیت لپاره جدي ګواښ

 د روسیې د بهرنیو چارو وزارت مرستیال سرګئي ورشینین ادعا کړې، چې یو شمېر لوېدیځ هېوادونه او اوکراین د افریقا د ساحل په سیمه کې له وسلوالو او ترهګریزو ډلو څخه د روسیې او چین د ګټو پر ضد استفاده کوي؛ هغه اقدام چې د نوموړي په وینا، نه یوازې سیمه‌ییز، بلکې نړیوال امنیت ته هم مستقیم ګواښ پېښوي

ورشینین ویلي، چې دا وسلوالې ډلې د ولس د وېرولو، ناامنۍ خپرولو او د تخریبي عملیاتو د ترسره کولو لپاره مالي او لوژستیک ملاتړ ترلاسه کوي. د هغه په خبره، لوېدیځ د اقتصادي فشارونو او مالي وسایلو له لارې بې‌وزله افریقایي هېوادونه د خطرناکو سیاسي او پوځي رقابتونو پر ډګر بدل کړي دي

د روسي چارواکو په وینا، د افریقا د ساحل په هېوادونو کې د ترهګرو ډلو پیاوړتیا نه یوازې د سیمې ثبات له منځه وړي، بلکې د ناقانونه وسلو، انساني قاچاق او افراطي افکارو د پراخېدو لامل هم ګرځي. مسکو ټینګار کوي، چې دا ډول سیاستونه د ترهګرۍ پر وړاندې د نړیوالې مبارزې له اصولو سره په ښکاره ټکر کې دي

سیاسي شنونکي وایي، د روسیې دا څرګندونې د نړیوالو قدرتونو ترمنځ د نفوذ د جګړې یوه بله څېره ده؛ جګړه چې ډګر یې اکثره بې‌وزله او جګړه‌ځپلې سیمې ګرځي، او قربانیان یې عادي خلک وي. د هغوی په باور، د افریقا تجربه ښيي چې کله وسلوالې ډلې د ستراتیژیکو موخو لپاره کارول کېږي، نو پایلې یې له کنټروله وځي

په همدې تړاو، یو مهم او حساس سوال راپورته کېږي: ایا افغانستان، چې خپله د لسیزو جګړو او وسلوالو ډلو تجربه لري، باید له دې وضعیت څخه عبرت وانخلي؟ څېړونکي وایي، د افریقا وضعیت د نورو هېوادونو لپاره د خطر زنګ دی او افغانستان ته پکار ده چې د خپلې خاورې د نه‌استعمال په اړه شفاف دریځ، عملي اقدامات او نړیوال باور رامنځته کړي

کارپوهان ټینګار کوي، که د وسلوالو ډلو پر وړاندې مخنیوی، څارنه او شفافیت جدي ونه نیول شي، نو افغانستان هم ښايي د نړیوالو رقابتونو د نوې لوبې په ډګر بدل شي. د افریقا تجربه دا پیغام لري، چې ناامنۍ ته بې‌پامي یوازې ستونزې ژوروي، نه حل کوي