بیجینګ ـ چین امریکا ته د تایوان په اړه جدي خبرداری؛ د اسیا ثبات تر پوښتنې لاندې

چین متحده ایالاتو ته خبرداری ورکړی چې د «یو چین» سیاست ته دې ژمن پاتې شي او د تایوان په مسئله کې دې له احتیاطه کار واخلي. دا خبرداری د امریکا د نوې ملي امنیتي ستراتیژۍ له اعلان وروسته صادر شوی، هغه ستراتیژي چې بیجینګ یې د سیمې د امنیت لپاره اندېښمنوونکې بولي

د چین د حکومت د تایوان چارو د دفتر ویاندې ژو فن‌لیان ویلي، چې واشنګټن باید په تایوان کې د بېلتون‌پالو ډلو له هڅولو ډډه وکړي، ځکه دا ډول اقدامات نه یوازې د چین او امریکا اړیکې ترینګلې کوي، بلکې د شخړې او احتمالي ټکر خطر هم زیاتوي. نوموړې ټینګار کړی، چې د تایوان مسئله د چین کورنۍ موضوع ده او بهرنی لاسوهنه د منلو وړ نه ده

چینایي چارواکي وایي، د امریکا له لوري د تایوان سیاسي او امنیتي ملاتړ د سیمې حساس توازن ګډوډوي او کولای شي ختیځه اسیا د یوې نوې کړکېچ‌زېږونکې مرحلې پر لور بوځي. د دوی په باور، د «یو چین» سیاست ته عملي ژمنتیا د سیمې د سولې او ثبات لپاره بنسټیز ارزښت لري

تایوان، چې په عملي ډول په خپلواکه بڼه اداره کېږي، د امریکا او د هغې د ځینو متحدینو سیاسي ملاتړ لري. خو بیجینګ دا ملاتړ د بېلتون‌پالنې د پیاوړتیا هڅه ګڼي او وایي، چې دا وضعیت به د اوږدمهاله ثبات پر ځای د شخړو د ژورېدو لامل شي

نړیوال شنونکي باور لري، چې د تایوان مسئله د امریکا او چین ترمنځ د ستراتیژیک رقابت یو له خورا حساسو ټکیو څخه ده. هغوی خبرداری ورکوي، که د دواړو لورو ترمنځ د خبرو او دیپلوماسۍ ځای د ګواښونو او پوځي ژبې لخوا ونیول شي، نو پایلې به یې یوازې پر دې دوو قدرتونو محدودې نه وي، بلکې د ټولې اسیا امنیت به تر جدي اغېز لاندې راولي

په داسې حال کې، پوښتنه دا ده چې ایا امریکا او چین به وکولای شي د اختلافاتو د مدیریت لپاره دیپلوماټیکه لاره غوره کړي، که دا لانجه به د اسیا د ثبات لپاره یوه نوې ازموینه وګرځي؟