کابل – تهران د طالبانو د ادارې او ايران ترمنځ د درملو تفاهم‌نامه؛ ايا د وارداتي کړکېچ بديل کېدای شي؟

کابل – تهران – د طالبانو د ادارې د عامې روغتيا وزارت يوه پلاوي ايران ته د سفر پر مهال د درملو د توليد، تامين او د مسلکي کادر د روزنې په برخه کې له ايراني لوري سره د همکارۍ تفاهم‌نامه لاسليک کړې ده. د ايراني چارواکو په وينا، د دې هوکړې موخه افغانستان ته د طبي تجهيزاتو برابرول، د لابراتوارونو پياوړتيا او د درملو د کيفيت د کنټرول يو منظم سيستم رامنځته کول دي

د راپورونو له مخې، دا تفاهم‌ نامه په داسې حساس وخت کې لاسليکېږي، چې افغانستان د درملو د وارداتو له جدي ستونزو سره مخ دی. د پاکستان له لارې د درملو واردات د وروستيو سرحدي کړکېچونو له امله ټکني شوي او دا چاره د هېواد په روغتيايي سکتور کې اندېښنې زياتې کړې دي

روغتيايي کارپوهان وايي، که څه هم له ايران سره همکاري کولی شي د درملو د کمښت يوه برخه جبران کړي، خو دا يوازې هغه مهال اغېزمنه تمامېدای شي، چې د تطبيق څرنګوالی يې روښانه، دوامدار او له سياسي اغېزو لرې وي. د دوی په باور، د درملو توليد او تامين يو تخنيکي او حياتي بهير دی، چې جدي څارنې او معياري ميکانيزمونو ته اړتيا لري

له بلې خوا، د عامې روغتيا د څار بنسټونه ټينګار کوي، چې د دې تفاهم‌نامې جزئيات، د تمويل سرچينې او د کيفيت د کنټرول ميکانيزمونه بايد په بشپړه توګه له ولس او مسلکي ادارو سره شريک شي، څو د درملو د ناقص کيفيت، انحصار او احتمالي فساد مخه ونيول شي

په داسې حال کې چې ميليونونه افغانان له بې‌وزلۍ، ناروغيو او د درملو له لوړو بيو سره لاس او ګرېوان دي، دا پوښتنه لا هم پر خپل ځای پاتې ده: ايا له ايران سره دا نوې همکاري به د خلکو عاجلې روغتيايي اړتياوې پوره کړي، که يوازې به د يوې موقتي حل‌لارې په توګه پاتې شي؟ د دې پوښتنې ځواب به د تفاهم‌نامې د عملي کېدو په بهير کې روښانه شي