روسیې په ۲۰۱۹ کال کې د یوې پټې معاملې اشاره کړې وه؛ د وینزویلا پر سر امتیاز، د اوکراین په بدل کې

بریانیوز:(چهارشنبه۱۷جدی۱۴۰۴) واشنګټن – د اسوشیټېډ پرېس  د راپور له مخې، د امریکا د ولسمشر ډونالډ ټرمپ پخوانۍ لوړپوړې سلاکارې د روسیې په چارو کې، فیونا هېل، افشا کړې چې روسي چارواکو لا په ۲۰۱۹ میلادي کال کې د یوې داسې سیاسي ـ ستراتیژیکې معاملې اشاره ورکړې وه، چې پر بنسټ یې مسکو چمتو و په وینزویلا کې له ولسمشر نیکولاس مادورو څخه خپل ملاتړ پای ته ورسوي، خو په دې شرط چې امریکا روسیې ته په اوکراین کې د «ازاد فعالیت» اجازه ورکړي

د راپور له مخې، فیونا هېل دغه څرګندونې په ۲۰۱۹ کال کې د امریکا کانګرس ته د خپلې شهادت پر مهال کړې وې، خو دا موضوع په هغه وخت کې پراخ انعکاس ونه موند. اوس، په داسې حال کې چې د امریکا له لوري د وینزویلا د ولسمشر نیکولاس مادورو د نیولو لپاره د پټو پوځي عملیاتو راپورونه خپاره شوي، د هېل دا پخوانۍ څرګندونې یو ځل بیا د نړیوالو رسنیو او ټولنیزو شبکو د بحث تود ټکی ګرځېدلې دي

فیونا هېل ویلي وو چې روسي چارواکو په غیرمستقیم ډول دا پیغام ورکړی و چې که واشنګټن د اوکراین په موضوع کې د مسکو لاس پرانستی پرېږدي او د روسیې نفوذ ته خنډ ونه ګرځي، نو کرېملېن چمتو دی چې په وینزویلا کې د مادورو له حکومت څخه سیاسي او ستراتیژیک ملاتړ کم یا پای ته ورسوي. د نوموړې په وینا، دا وړاندیز د روسیې د پراخې نړیوالې معاملې د تفکر ښکارندویي کوله، چې پکې ستر هېوادونه د کوچنیو هېوادونو پر برخلیک د امتیازاتو پر بنسټ خبرې کوي

شنونکي وایي، د فیونا هېل دا څرګندونې د روسیې د بهرني سیاست هغه تګلاره بربنډوي، چې پر اساس یې مسکو هڅه کوي بېلابېلې نړیوالې جبهې سره وتړي او د یوې سیمې امتیاز د بلې سیمې په بدل کې معامله کړي. د هغوی په باور، اوکراین د روسیې لپاره حیاتي ارزښت لري، خو وینزویلا تر ډېره د امریکا پر وړاندې د فشار د وسیلې په توګه کارول شوې ده

د راپور له مخې، د مادورو د نیولو لپاره د امریکا د وروستیو پټو عملیاتو خبرونو دا بحث بیا تازه کړی، چې ایا واشنګټن لا هم د وینزویلا په اړه خپلې ستراتیژۍ بدلې کړې او که نه، او دا چې د روسیې او امریکا ترمنځ د پردې تر شا سیاسي معاملې تر کومه بریده د نړیوالو کړکېچونو پر مسیر اغېز لري

تر اوسه د روسیې حکومت د فیونا هېل د دغو څرګندونو په اړه رسمي غبرګون نه دی ښودلی، خو مسکو تل دا رد کړې چې ګواکې د وینزویلا یا اوکراین موضوعات د معاملې د وسیلې په توګه کاروي. له بلې خوا، امریکايي چارواکي هم په رسمي ډول نه مني چې واشنګټن دې کله هم د اوکراین پر سر د روسیې سره د امتیاز معامله کړې وي

سیاسي څېړونکي وایي، که دا ادعاوې رښتیا وي، نو دا به وښيي چې د نړیوال سیاست تر شا پټې معاملې څنګه د میلیونونو خلکو پر ژوند، د هېوادونو پر حاکمیت او د جګړو او شخړو پر برخلیک اغېز کوي. د هغوی په وینا، د فیونا هېل څرګندونې نه یوازې د تېر وخت کیسه ده، بلکې د اوسني نړیوال سیاسي واقعیت یو خطرناک انځور هم وړاندې کوي، چې پکې ځواکمن هېوادونه لا هم د نفوذ د پراخولو لپاره له هرې وسیلې کار اخلي