په اسلام‌آباد کې د افغان خبریال نیول کېدل؛ د پاکستان د پولیسو چوپتیا اندېښنې زیاتې کړې

بریانیوز:( شنبه۲۰  جدی۱۴۰۴) اسلام‌آباد — د پاکستان له پلازمېنې اسلام‌آباد څخه رسېدلي معلومات ښيي چې یو افغان ازاد خبریال، عبیدالله احمدي، د پاکستان د پولیسو له‌خوا نیول شوی دی. سرچینو د خبري شبکې ته ویلي چې تر دې دمه د نوموړي د نیول کېدو رسمي علت نه دی روښانه شوی او د پاکستان پولیسو هم په دې اړه کوم وضاحت نه دی ورکړی

د راپورونو له مخې، عبیدالله احمدي له هغو افغان خبریالانو څخه دی چې د وروستیو کلونو سیاسي بدلونونو وروسته پاکستان ته کډه شوی و او هلته یې د ازاد خبریال په توګه فعالیت کاوه. د هغه نیول کېدل په داسې حال کې کېږي چې په پاکستان کې د افغان کډوالو وضعیت ورځ تر بلې نازک کېږي

د پولیسو چوپتیا او د اندېښنو زیاتوالی

تر اوسه د پاکستان پولیسو نه دي ویلي چې ولې احمدي نیول شوی، پر هغه کوم تور لګېدلی او یا دا چې قانوني بهیر یې په کوم پړاو کې دی. دا چوپتیا د خبریالانو د حقونو د ملاتړو او د بشري حقونو د فعالانو ترمنځ اندېښنې زیاتې کړې دي

ځینې رسنیزې سرچینې وايي، د عبیدالله احمدي نیول کېدل ښايي د هغو پراخو عملیاتو برخه وي چې په وروستیو اونیو کې د پاکستان پولیسو د افغان کډوالو پر ضد پیل کړي دي

پر افغان کډوالو فشارونه زیات شوي

دا پېښه په داسې وخت کې رامنځته کېږي چې د پاکستان پولیسو په اسلام‌آباد او شاوخوا سیمو کې د کور په کور پلټنو لړۍ شدیده کړې، څو هغه افغان کډوال ونیسي چې د اوسېدو قانوني اسناد نه لري او هغوی په جبري ډول له هېواده وباسي.

د بشري حقونو بنسټونه خبرداری ورکوي چې په دې عملیاتو کې نه یوازې بې‌اسناده کډوال، بلکې هغه کسان هم نیول کېږي چې د قانوني اسنادو د نوي کولو په بهیر کې دي، او حتا خبریالان، زده‌کوونکي او فعالان هم له ستونزو سره مخ شوي دي

غبرګونونه او غوښتنې

د خبریالانو د ملاتړ یو شمېر بنسټونو د عبیدالله احمدي د نیول کېدو په اړه ژوره اندېښنه ښودلې او له پاکستاني چارواکو یې غوښتي چې د هغه د نیولو قانوني دلیل روښانه کړي او د بیان ازادۍ ته درناوی وکړي.

دوی ټینګار کوي چې خبریالان باید د خپلې مسلکي دندې له امله ونه ځورول شي او د هغوی خوندیتوب باید تضمین شي

د افغان خبریال عبیدالله احمدي نیول کېدل د پاکستان په پلازمېنه کې د افغان کډوالو پر وړاندې د سختو اقداماتو په دوام کې یوه نوې اندېښمنوونکې پېښه بلل کېږي. د پاکستان د پولیسو چوپتیا او د نیولو د علت نه روښانتیا، د بشري حقونو او د رسنیو د ازادۍ په اړه جدي پوښتنې راپورته کړې دي