اسلام‌آباد — پاکستان خپلو وګړو ته ایران ته د سفر نه کولو سپارښتنه وکړه

 بریانیوز:( شنبه۲۰  جدی۱۴۰۴) د پاکستان د بهرنیو چارو وزارت د امنیتي اندېښنو له امله د دغه هېواد له وګړو غوښتي چې تر بلې خبرتیا پورې ایران ته له غیرضروري سفرونو ډډه وکړي. یادوزارت ویلي، دا پرېکړه د خپلو اتباعو د ژوند، خوندیتوب او امنیت د ساتنې په موخه شوې ده

د پاکستان د بهرنیو چارو وزارت د شنبې په ورځ (۲۰ جدی) په یوه رسمي اعلامیه کې څرګنده کړه چې تر هغو چې په ایران کې وضعیت عادي شوی نه وي، د پاکستان وګړي باید ایران ته د سفر له پلانونو تېر شي. په اعلامیه کې ټینګار شوی چې اوسنی وضعیت د احتیاط غوښتنه کوي

په ایران کې مېشت پاکستانیانو ته د احتیاط غوښتنه

په ورته اعلامیه کې، د پاکستان حکومت له هغو اتباعو هم غوښتي چې دا مهال په ایران کې حضور لري، څو نهایت احتیاط وکړي. د بهرنیو چارو وزارت ویلي، دغه کسان باید هوښیار واوسي، د غیرضروري تګ راتګ مخه ونیسي او خپل ورځني فعالیتونه محدود وساتي.

همداراز، له پاکستانیانو غوښتل شوي چې په منظم ډول د ایران په بېلابېلو ښارونو کې د پاکستان له سفارت او قونسلګریو سره اړیکه وساتي، څو د هر ډول احتمالي بیړني وضعیت پر مهال ورته پر وخت مرسته ورسېږي

د امنیتي وضعیت په اړه اندېښنې

که څه هم د پاکستان د بهرنیو چارو وزارت په خپله اعلامیه کې د امنیتي ګواښونو جزییات نه دي روښانه کړي، خو دا خبرداری په داسې وخت کې خپور شوی چې په سیمه کې امنیتي وضعیت نازک بلل کېږي او د بېلابېلو پېښو راپورونه ورکړل شوي دي.

سیاسي شنونکي وايي، دا ډول سپارښتنې عموماً هغه مهال کېږي چې حکومتونه د خپلو وګړو د خوندیتوب په اړه جدي اندېښنې ولري او غواړي له هر ډول احتمالي زیان څخه مخنیوی وکړي

د پاکستان له‌خوا خپلو وګړو ته ایران ته د سفر د نه کولو سپارښتنه د سیمې د حساس امنیتي وضعیت څرګندونه کوي. اسلام‌آباد ټینګار کړی چې د وضعیت تر ښه کېدو پورې به دا سپارښتنه پر خپل ځای وي او د پاکستاني وګړو خوندیتوب د حکومت لومړیتوب دی