د امریکا د کډوالۍ ادارې یو افغان مهاجر په نیویارک کې ونیوه

بریانیوز:( سه شنبه۲۳ جدی۱۴۰۴)د امریکا د کډوالۍ او ګمرک ادارې اعلان کړی چې یو افغان مهاجر، وحیدالله (وحید الله) محمد، ۳۹ کلن، یې د روان میلادي کال

د جنورۍ په لومړۍ نېټه د نیویارک ایالت په راچسټر ښار کې نیولی دی. د یادې ادارې په وینا، نوموړی د جدي جنايي سابقې له امله د امریکا د مهاجرت له قوانینو سرغړونکی بلل کېږي

 د خپرو شوو معلوماتو له مخې، وحیدالله محمد په ۲۰۰۸ کال کې د کورني جنجال پر مهال خپله ۱۹ کلنه خور څو ځله په چاقو وهلې وه او د هغې د وژلو هڅه یې کړې وه

ویل کېږي چې هغه د شخړې پر مهال خپله خور د «بدې مسلمانې نجلۍ» په نوم یاده کړې وه او تور یې ورباندې پورې کړی و چې د نامناسب لباس اغوستلو او د نڅا کلبونو ته د تګ له امله یې د کورنۍ نوم بدنام کړی دی

د نیویارک ایالت محکمې په ۲۰۰۹ کال کې وحیدالله محمد د لومړۍ درجې د وژنې د هڅې او د لومړۍ درجې د برید په جرمونو مجرم وباله او هغه ته یې د ۱۰ کلونو بند او تر خوشې کېدو وروسته د ۵ کلونو د څار (نظارت) سزا واوروله. دا قضیه هغه مهال د امریکا په رسنیو کې د کورني تاوتریخوالي او د ناموس تر نامه لاندې د جرمونو د بحث یوه بېلګه ګرځېدلې وه

د رسمي اسنادو له مخې، وحیدالله محمد په ۲۰۰۴ کال کې په قانوني ډول متحده ایالاتو ته داخل شوی و، خو د هغه جنايي محکومیت د امریکا د مهاجرت قوانین تر پښو لاندې کړل. له همدې امله، په ۲۰۱۲ کال کې د امریکا د مهاجرت اړوندو ادارو د هغه پر وړاندې د اخراج (ډیپورټ) حکم صادر کړ

چارواکو ویلي چې نوموړی اوس د فدرالي کډوالۍ په توقیف کې ساتل کېږي او د هغه د ایستلو قانوني پروسه روانه ده. دغې ادارې ټینګار کړی چې هغه بهرني وګړي چې جدي جنايي جرمونه ترسره کړي وي، د عامه امنیت لپاره ګواښ ګڼل کېږي او د قانون له مخې به له هېواده وایستل شي

دا پېښه په داسې حال کې رامنځته کېږي چې د امریکا حکومت په وروستیو کلونو کې د جنايي سابقې لرونکو مهاجرو پر وړاندې د سختو اقداماتو ټینګار کړی او ویلي یې دي چې د قانون حاکمیت او د ټولنې خوندیتوب یې لومړیتوب دی

شنونکي باور لري چې دا ډول قضیې نه یوازې د مهاجرت پر پالیسۍ اغېز لري، بلکې د کډوالو د انځور، ټولنیز ادغام او د قانون د تطبیق په اړه هم پراخ بحثونه راپاروي