د نجونو پر زده‌کړو بندیز ۱۵۷۴مې ورځې ته ورسېد؛ افغانستان د یوه «چوپ نسل» له خطر سره مخ دی

بریانیوز:( سه شنبه۲۳ جدی۱۴۰۴)  په افغانستان کې د طالبانو له لوري د نجونو پر زده‌کړو بندیز اوس د زرو او پنځه‌سوه څلور اویا (۱۵۷۴) ورځو ته داخل شوی، خو لا هم د شپږم ټولګي څخه پورته د نجونو لپاره ښوونځي تړلي پاتې دي. سره له پرله‌ پسې نړیوالو غوښتنو، د بشري حقونو د سازمانونو خبرداریو او د اسلامي هېوادونو د علماوو څرګندونو، طالبانو تر اوسه نه یوازې دا بندیز نه دی لرې کړی، بلکې د ښوونځیو د بیا پرانیستو لپاره یې کوم روښانه مهالوېش هم نه دی اعلان کړی.

دا اوږدمهاله بندیز د افغانستان د معاصر تاریخ له تر ټولو سختو او بې‌سارو تعلیمي محدودیتونو څخه بلل کېږي، چې په مستقیم ډول یې د میلیونونو نجونو بنسټیز حق تر پښو لاندې کړی او د هېواد راتلونکی یې له تیارو سره مخ کړی دی

د «زده‌کړه انتظار نه شي کولی» نړیوال کمپاین هم‌مهاله، نړیوال بنسټ ده‌کړه انتظار نه شي کولی» یو ځل بیا د افغان نجونو د ملاتړ لپاره خپل دادخواهانه کمپاین د «افغان نجونو غږ» تر سرلیک لاندې بیا پیل کړی دی. دې ادارې له نړیوالې ټولنې، مرستندویو هېوادونو، نړیوالو سازمانونو، مدني فعالانو او د بشري حقونو له مدافعینو غوښتي چې د افغان نجونو د زده‌کړو د حق لپاره عملي، دوامدار او اغېزمن ملاتړ وکړي

یاد بنسټ په خپلو څرګندونو کې ټینګار کړی چې زده‌کړه یو بنسټیز بشري حق دی چې د جګړې، سیاست او ایډیالوژۍ قرباني کېدای نه شي. د ادارې په وینا، په افغانستان کې د نجونو له زده‌کړو محرومول نه یوازې د ښځو پر وړاندې تبعیض دی، بلکې د ټولنې پر نیمایي وګړو د چوپتیا تحمیل دی.

ټولنیزې او اقتصادي پایلې

ښوونیز او ټولنیز کارپوهان خبرداری ورکوي چې د نجونو پر زده‌کړو بندیز به اوږدمهاله، نه جبرانېدونکې پایلې ولري. د دوی په وینا، دا بندیز به د بې‌سوادۍ کچه لوړه کړي، د ماشومانو ودونه به زیات کړي، د ښځو روغتیايي وضعیت به خراب کړي او د هېواد اقتصادي وده به له جدي ځنډ سره مخ کړي.

کارپوهان وایي، هغه ټولنه چې نجونې ترې حذف شي، د پرمختګ، نوښت او ثبات نیمایي ځواک له لاسه ورکوي. افغانستان چې له مخکې د فقر، بیکارۍ او بشري بحران سره مخ دی، د نجونو له زده‌کړو پرته به لا ژورې ټولنیزې ستونزې تجربه کړي

د نړیوالو غبرګونونو دوام

د ملګرو ملتونو، اروپایي اتحادیې، اسلامي همکاریو سازمان او ګڼو نړیوالو بنسټونو له لوري وار وار غوښتنې شوې چې طالبان دې د نجونو پر زده‌کړو بندیز ژر تر ژره پای ته ورسوي. ډېری اسلامي علماوو هم ټینګار کړی چې د نجونو تعلیم د اسلام له اصولو سره په ټکر کې نه دی، بلکې یو ديني فریضه ده.

سره له دې، طالبانو لا هم د خپلو پرېکړو په اړه انعطاف نه دی ښودلی او د بندیز دوام یې د نړیوالې ټولنې اندېښنې لا زیاتې کړې دي.

«افغان نجونو غږ»؛ د هېرېدو پر وړاندې مبارزه

د «افغان نجونو غږ» کمپاین هڅه کوي چې د افغان نجونو ستونزه د نړۍ له اجنډا ونه لوېږي. د دې کمپاین له لارې، نړیوالو ته دا پیغام رسول کېږي چې د افغان نجونو چوپتیا د رضا معنا نه لري، بلکې د محدودیتونو پایله ده

فعالان وایي، که نړیواله ټولنه په عملي ډول اقدام ونه کړي، نو افغانستان به د یوه داسې نسل شاهد وي چې له ښوونځي، پوهې او  راتلونکي بې‌برخې پاتې شوی وي—هغه نسل چې د هېواد د بیا ودانولو لپاره تر ټولو زیات اړتیا ورته ده