دملګرو ملتونو د سرمنشي سیاسي مرستیاله کابل ته سفر کوي؛ د افغانستان د سیاسي بن‌بست د ماتولو نوې هڅه

 بریانیوز:( چهار شنبه۲۴ جدی۱۴۰۴) د ملګرو ملتونو د سرمنشي سیاسي او د سولې د چارو مرستیاله، روز ماري ډېکارلو، ټاکل شوې ده چې د روانې میلادي میاشتې په پای کې کابل ته سفر وکړي. دا سفر په داسې حساس وخت کې ترسره کېږي چې افغانستان له سیاسي انزوا، اقتصادي بحران او بشري ناورین سره مخ دی او د نړیوالو او د طالبانو ترمنځ اړیکې لا هم له جدي ننګونو ډکې دي

د افغانستان لپاره د ملګرو ملتونو د مرستندویه پلاوي (یوناما) سرپرستې، جورجت ګانیون، د طالبانو د بهرنیو چارو له سرپرست وزیر امیرخان متقي سره په لیدنه کې د دې سفر اعلان کړی او د سفر د ښه تنظیم او بریا لپاره یې د طالبانو د همکارۍ غوښتنه کړې ده

 د لیدنې جزیات او د سفر محورونه

د طالبانو د بهرنیو چارو وزارت په یوه خبرپاڼه کې ویلي چې په دې لیدنه کې دواړو لوریو د روز ماري ډېکارلو د کابل د سفر پر اجنډا، د نوموړې پر احتمالي لیدنو، او د ملګرو ملتونو د رول پر دوام خبرې کړې دي. یوناما ټینګار کړی چې دا سفر د افغانستان د روان وضعیت د نږدې ارزونې او د سیاسي تماسونو د ساتلو لپاره مهم دی.

 د دوحې بهیر او د ډېکارلو رول

روز ماري ډېکارلو د افغانستان په تړاو د دوحې د بهیر د پرمخ بېولو مسؤلیت پر غاړه لري؛ هغه بهیر چې د ملګرو ملتونو په نوښت پیل شوی، څو د افغانستان لپاره یو سیاسي حل ولټول شي. نوموړې د ۱۴۰۳ لمریز کال د سرطان په میاشت کې د دوحې د بهیر د درېیمې ناستې مشري کړې وه. دا ناسته که څه هم د طالبانو په ګډون ترسره شوه، خو د افغانستان د ښځو او د مدني ټولنو د استازو له نه ګډون سره مل وه، چې پراخ کورني او نړیوال غبرګونونه یې راوپارول

 د سفر احتمالي موخې

سیاسي شنونکي باور لري چې د ډېکارلو دا سفر ښايي لاندې موخې ولري:

د افغانستان د سیاسي او امنیتي وضعیت مستقیم ارزونه

د دوحې بهیر د راتلونکې په اړه له طالبانو سره سلا مشورې

د نړیوالې ټولنې د اندېښنو شریکول، په ځانګړي ډول د ښځو حقونه، د نجونو زده‌کړې او ټول‌شموله حکومت

د بشري مرستو، اقتصادي ستونزو او نړیوال تعامل په اړه خبرې

 سفر د جدي ننګونو تر سیوري لاندې

دا سفر په داسې حال کې ترسره کېږي چې طالبان لا هم د نړۍ له لوري په رسمیت نه دي پېژندل شوي او د ښځو پر زده‌کړو او کار محدودیتونه، د بیان ازادۍ ته خنډونه او د سیاسي مشارکت نشتوالی د نړیوالې ټولنې له مهمو غوښتنو څخه دي. همدارنګه، افغانستان لا هم له سخت اقتصادي فشار، بې‌کارۍ او د بشري مرستو له کموالي سره مخ دی

 پایله او ارزونه

د ملګرو ملتونو د لوړپوړې چارواکې کابل ته سفر، که څه هم د طالبانو د حکومت د رسمي پېژندنې معنا نه لري، خو دا ښيي چې نړیواله ټولنه هڅه کوي د افغانستان لپاره د خبرو اترو لارې پرانیستې وساتي. د دې سفر پایلې ښايي د دوحې د بهیر پر راتلونکې، د ملګرو ملتونو پر رول او د افغانستان پر نړیوال تعامل اغېز ولري