کویټه — د بلوچستان په بېلابېلو سیمو کې همغږي بریدونه؛ امنیتي وضعیت لا نور کړکېچن شو

کویټه — د بلوچستان په بېلابېلو سیمو کې همغږي بریدونه؛ امنیتي وضعیت لا نور کړکېچن شو 

بریانیوز:(سه شنبه،۱۱ حمل۱۴۰۵)

د پاکستان د بلوچستان په بېلابېلو سیمو کې پر امنیتي ځواکونو، پولیسو او دولتي تاسیساتو یو لړ همغږي او منظم بریدونه ترسره شوي، چې له امله یې مرګ‌ ژوبله هم رامنځته شوې ده

ځایي سرچینې وایي چې دا بریدونه په هم‌مهاله ډول د کویټه، مستونګ، نوشکي او خاران کې ترسره شوي دي. په دغو بریدونو کې د امنیتي پوستو ترڅنګ د رېل پټلۍ، سړکونو او ځینو مهمو دولتي تاسیساتو په نښه کېدو راپورونه هم ورکړل شوي دي

په ځینو سیمو کې د چاودنو ترڅنګ پر امنیتي ځواکونو وسله‌وال بریدونه هم شوي، چې له امله یې سختې او څو ساعته نښتې رامنځته شوې دي. عیني شاهدان وایي چې د شپې او سهار په وخت کې د ډزو او چاودنو غږونه اورېدل کېدل، او په ځینو سیمو کې خلکو د وېرې له امله خپل کورونه هم پرېښي وو

د پاکستاني امنیتي چارواکو په وینا، ډېری بریدونه د ځواکونو له لوري په وخت شنډ شوي او وضعیت تر ډېره د کنټرول لاندې راوستل شوی دی. خو چارواکو تایید کړې چې په دې پېښو کې یو شمېر کسان وژل شوي او یو شمېر نور ټپیان شوي دي، چې په کې د امنیتي ځواکونو غړي هم شامل دي. همدارنګه د ځینو پوځي او پولیسو تاسیساتو ته هم زیان اوښتی دی

امنیتي ادارې وایي چې په سیمه کې د پلټنو او چاڼ عملیات روان دي او هڅه کوي د بریدونو عاملین وپیژني او عدالت ته یې راکاږي. چارواکو همدارنګه د امنیتي وضعیت د لا ښه کولو لپاره د اضافي ځواکونو د ځای پر ځای کېدو خبره کړې ده

تر اوسه پورې هېڅ کومې ډلې د دغو بریدونو مسوولیت پر غاړه نه دی اخیستی، خو په بلوچستان کې د وروستیو کلونو ناامني او ورته پېښو تکرار د سیمې امنیتي وضعیت لا نور پېچلی کړی دی

سیاسي شنونکي وایي چې د داسې همغږو بریدونو زیاتوالی ښيي چې وسله‌والې ډلې لا هم د منظم فعالیت وړتیا لري، او دا حالت د حکومت لپاره د امنیتي تګلارو د بیا ارزونې اړتیا لا جدي کوي. دوی زیاتوي چې د اوږدمهاله ثبات لپاره یوازې پوځي اقدامات بسنه نه کوي، بلکې سیاسي او اقتصادي حل لارې هم اړینې دي