اسعد آباد : د کونړ په اسعد آباد کې سلګونه کورنۍ بې‌ځایه شوې؛ د امنیتي کړکېچ له امله د خلکو پراخ کډوالي

اسعد آباد : د کونړ په اسعد آباد کې سلګونه کورنۍ بې‌ځایه شوې؛ د امنیتي کړکېچ له امله د خلکو پراخ کډوالي

بریانیوز:(سه شنبه،۱۱ حمل۱۴۰۵)

 د افغانستان د کونړ ولایت له مرکز اسعد آباد څخه سلګونه کورنۍ د ناڅاپي او نامعلوم وضعیت له امله خپلو کورونو پرېښودو ته اړ شوې دي او پر بېلابېلو لارو یې د خوندي ځایونو په لور حرکت کړی دی

په دغو بې‌ځایه شویو کورنیو کې ښځې، ماشومان او سپین‌ږیري شامل دي، چې د سختو شرایطو او د شتمنیو د پرېښودو له امله له جدي ستونزو سره مخ شوي دي. عیني شاهدان وایي چې د خلکو وتل په توره شپه کې پیل شوي او د وېرې او اضطراب فضا حاکمه وه

ځایي اوسېدونکي وایي چې د دې بې‌سارې کډوالۍ اصلي لامل د پاکستان له لوري د سرحدي بریدونو شدت بلل کېږي. د دوی په وینا، د وروستیو بریدونو له امله په سیمه کې امنیتي وضعیت خراب شوی او خلک اړ شوي چې د خوندي سیمو په لټه کې له خپلو مېنو ووځي

همدارنګه راپورونه وایي چې په وروستیو بریدونو کې لږ تر لږه ۴ کسان وژل شوي او تر شلو زیات نور ټپیان شوي دي، چې د ځینو روغتیايي وضعیت نازک بلل کېږي. روغتیايي سرچینې وایي چې ټپیان د درملنې لپاره نږدې روغتونونو ته لېږدول شوي دي

یو شمېر کونړ مېشتو له ګاونډي ولایت ننګرهار خلکو او چارواکو غوښتنه کړې چې د بې‌ځایه شویو کورنیو د لنډمهالې مېشتېدو او خوراکي مرستو لپاره لاسنیوی وکړي، څو دا کورنۍ له سخت بشري وضعیت سره مخ نه شي

په سیمه کې د وضعیت د کنټرول لپاره امنیتي هڅې روانې دي، خو د خلکو د وېرې او بې‌باورۍ فضا لا هم پر ځای پاتې ده

سیاسي او بشري چارو شنونکي وایي چې د سرحدي تاوتریخوالي زیاتوالی نه یوازې امنیتي ستونزې رامنځته کوي، بلکې د ملکي خلکو ژوند هم له جدي خطر سره مخ کوي. دوی ټینګار کوي چې د داسې کړکېچونو د مخنیوي لپاره د ډیپلوماسۍ او دوامدارو خبرو اترو اړتیا تر بل هر وخت زیاته شوې ده