تل ابیب — د جګړې سیوري د اقتصاد پر وده؛ اسرائیل د ۲۰۲۶ کال د ودې اټکل په څرګند ډول راکم کړ

تل ابیب — د جګړې سیوري د اقتصاد پر وده؛ اسرائیل د ۲۰۲۶ کال د ودې اټکل په څرګند ډول راکم کړ

بریانیوز:(سه شنبه،۱۱ حمل۱۴۰۵)

د د اسرائیلو د مالیې وزارت په رسمي راپور کې ویل شوي چې د اسرائیل اقتصادي وده د ۲۰۲۶ کال لپاره د پام وړ کموالی موندلی او د پخواني اټکل په پرتله یې ښکته لوری نیولی دی

د وزارت د تازه ارزونو له مخې، چې د ایران او جنوبي لبنان د روانو شخړو اقتصادي اغېزې پکې تحلیل شوې دي، د هېواد د اقتصادي ودې وړاندوینه له ۵.۲ سلنې څخه ۳.۳ سلنې ته راټیټه شوې ده. چارواکي وایي چې د جګړې پراخېدو د دولتي لګښتونو د زیاتوالي، د امنیتي بودیجې د لوړوالي او د اقتصادي فعالیتونو د سستوالي لامل شوی دی

اقتصادي شنونکي وایي چې د جګړې دوام د پانګونې پر چاپېریال منفي اغېز کړی، د خصوصي سکتور باور یې کم کړی او د سوداګرۍ جریانونه یې هم تر فشار لاندې راوستي دي. د دوی په وینا، په داسې بې‌ثباته شرایطو کې د اقتصاد طبیعي وده ورو کېږي او د راتلونکي لپاره ناڅرګندتیا زیاتېږي

د راپور په وینا، که چیرې روانه جګړه د راتلونکي کال د جون تر میاشتې وغځېږي، نو د اسرائیل مالي او اقتصادي وضعیت به له لا سختو ننګونو سره مخ شي. په ځانګړي ډول د بودیجې کسر، د دولتي پورونو زیاتوالی او د مالي بازارونو بې‌ثباتي هغه خطرونه ګڼل شوي چې احتمال یې زیات بلل شوی دی

بل لور ته، سیاسي کارپوهان ټینګار کوي چې د سیمې اوسنی کړکېچ یوازې امنیتي اړخ نه لري، بلکې د اقتصادي ثبات لپاره هم جدي ګواښونه رامنځته کوي. د دوی په باور، که شخړې دوام وکړي، نو نه یوازې اسرائیل، بلکې د ټولې سیمې اقتصادونه به له غیرمستقیم فشارونو سره مخ شي

کارپوهان زیاتوي چې د اوږدمهاله اقتصادي ثبات لپاره د تاوتریخوالي کمول او د ډیپلوماټیکو هڅو پیاوړتیا تر ټولو مهمه اړتیا ده، ځکه جګړې د پرمختګ بهیر ورو کوي او د خلکو پر معیشت ژور اغېز پرې باسي