د منځنۍ اسیا په زړه کې د افغانستان اقتصادي ځلا؛ په ازبکستان کې د نړیوال صنعتي نندارتون له لارې د سوداګرۍ نوې دروازې پرانیستل کېږي

د منځنۍ اسیا په زړه کې د افغانستان اقتصادي ځلا؛ په ازبکستان کې د نړیوال صنعتي نندارتون له لارې د سوداګرۍ نوې دروازې پرانیستل کېږي

بریانیوز:( دوشنبه،۳۱ حمل۱۴۰۵) 

نورالدین عزیزی، د افغانستان د صنعت او سوداګرۍ وزیر، د یوې سترې نړیوالې صنعتي نندارتون کې د ګډون په موخه ازبکستان ته سفر کړی دی

دا نندارتون چې د منځنۍ اسیا په کچه له مهمو اقتصادي او ټکنالوژیکو غونډو څخه شمېرل کېږي، د سیمې او نړۍ د سوداګرۍ، صنعت او نوښتونو د نښلولو یو مهم پل بلل کېږي

په دې پراخ نندارتون کې د بېلابېلو هېوادونو لوړپوړي چارواکي، پانګه‌وال، سوداګر او تولیدوونکي ګډون لري، چې له ډلې یې روسیه، قزاقستان او تاجکستان شامل دي

ګډونوال هڅه کوي چې د اقتصادي همکاریو د پیاوړتیا، د ګډو پانګونو د رامنځته کېدو، او د سوداګریزو اړیکو د پراختیا لپاره نوې لارې چارې ولټوي، څو د سیمې اقتصادي ودې ته چټکتیا ورکړي

د افغانستان د صنعت او سوداګرۍ وزارت په خپره شوې خبرپاڼه کې ویل شوي، چې له ۶۰ څخه زیات افغان شرکتونه هم په دې نندارتون کې ګډون لري

دغه شرکتونه د کرنې، کانونو، د ډبرو سکرو، وچو مېوو، درملیزو بوټو او مصالحو په برخو کې فعالیت کوي او هڅه کوي چې د افغانستان د تولیداتو کیفیت، ځانګړتیاوې او بازارموندنې وړتیاوې نړیوالو پانګه‌ والو او سوداګرو ته وروپېژني

سربېره پر دې، ټاکل شوې چې د افغان پلاوي او د بېلابېلو هېوادونو د استازو ترمنځ دوه‌اړخیزې ناستې هم ترسره شي، چې پکې به د سوداګرۍ د اسانتیاوو، د ترانزیټ د پراختیا، او د ګډو صنعتي پروژو پر امکاناتو بحث وشي

دا ډول ناستې کولای شي د باور فضا پیاوړې کړي او د اوږدمهاله اقتصادي همکاریو بنسټ کېږدي

کارپوهان باور لري، چې د دې ډول نړیوالو نندارتونونو ګډون د افغانستان لپاره یو مهم فرصت دی، څو خپل اقتصادي ظرفیتونه نړیوالو ته وړاندې کړي، د صادراتو لپاره نوې لارې ومومي 

او د بهرنۍ پانګونې د راجلبولو زمینه برابره کړي. همداراز، دا هڅې کولای شي د هېواد د کورنیو تولیداتو د ودې، د کارموندنې د زیاتوالي او د اقتصادي ثبات په ټینګښت کې مهم رول ولوبوي