د تهران او واشنګټن ترمنځ د خبرو بهیر په ټپه درېدلی؛ ایران د امریکا فشارونه او دریځونه د مذاکراتو خنډ بولي

د تهران او واشنګټن ترمنځ د خبرو بهیر په ټپه درېدلی؛ ایران د امریکا فشارونه او دریځونه د مذاکراتو خنډ بولي

بریانیوز:( دوشنبه،۳۱ حمل۱۴۰۵) 

د ایران او متحده ایالات ترمنځ د خبرو اترو روان بهیر له جدي کړکېچ او خنډونو سره مخ شوی دی

دواړه لوري یو بل د بې‌باورۍ، سختو دریځونو او سیاسي فشارونو په زیاتولو تورنوي، چې له امله یې د مذاکراتو فضا ورځ تر بلې پېچلې کېږي

ایراني لوری وایي، د امریکا له لوري “زیاتې او غیرمعقولې غوښتنې”، پرله‌پسې د دریځ بدلون، او ګواښوونکي سیاسي څرګندونې د دې لامل شوي چې د خبرو بهیر ودرېږي. همدارنګه، تهران ادعا کوي چې د سمندري فشارونو زیاتوالی او هغه اقدامات چې د اوربند له اصولو سرغړونه بلل کېږي، د اعتماد فضا له منځه وړې ده

په راپور کې دا هم ویل شوي، چې د اسلام‌اباد کې د دویم پړاو مذاکراتو د پیل په اړه د امریکا اعلان د ایران له لوري “رسنیزه او تبلیغاتي لوبه” بلل شوې، چې هدف یې د نړیوالو افکارو اغېزمنول او پر ایران سیاسي فشار زیاتول دي، نه رښتینی پرمختګ

بل لور ته، د ډونالډ ټرمپ له وروستیو څرګندونو سره سم، ویل شوي وو چې امریکایي پلاوی به د خبرو لپاره اسلام‌اباد ته ولاړ شي او د مذاکراتو نوی پړاو به پیل کړي

خو د اوسني وضعیت له مخې دا هڅې له نامعلوم برخلیک سره مخ ښکاري

شنونکي وایي، د دواړو هېوادونو ترمنځ د باور کمښت، سخت سیاسي دریځونه او د سیمه‌ییزو کړکېچونو زیاتوالی د دې لامل شوی چې خبرې د پرمختګ پر ځای د درېدلو حالت ته ننوځي. دوی زیاتوي، که دا اختلافات حل نه شي،

نو نه یوازې به د دواړو هېوادونو اړیکې لا خرابې شي، بلکې د منځني ختیځ امنیت او نړیوال اقتصاد به هم تر جدي اغېز لاندې راشي، په ځانګړي ډول د انرژۍ د بازارونو او سمندري لارو په برخه کې