مقاله

د تهران سخت پیغام؛ قالیباف د ګواښونو تر سیوري لاندې خبرې رد کړې او د نوو وړتیاوو د ښودلو خبر ورکوي

اشتراک گذاری:

بریانیوز:( سه شنبه،۱/ثور/۱۴۰۵هـــ .ش)

د محمد باقر قالیباف، چې د ایران د پارلمان مشر دی، په تازه څرګندونو کې ویلي چې تهران به هېڅکله د ګواښونو او فشارونو تر سیوري لاندې له متحده ایالات سره خبرې و نه کړي. د هغه په وینا، په تېرو دوو اوونیو کې ایران د جګړې په ډګر کې د خپلو نوو وړتیاوو د ښودلو لپاره پراخ چمتووالی نیولی دی

قالیباف زیاته کړې، چې د ډونالډ ټرمپ موخه دا ده چې “د سمندري محاصرې او د اوربند په سرغړونې سره د مذاکراتو مېز د تسلیمېدو پر مېز بدل کړي” او دا حالت د بیاځلي جګړې د پيل لپاره د پلمې په توګه وکاروي. د هغه په خبره، دا ډول تګلاره نه یوازې د باور فضا له منځه وړي، بلکې د سیمې امنیت هم له جدي ګواښ سره مخ کوي

هغه ټینګار وکړ، چې ایران به د خپل ملي حاکمیت، امنیت او ستراتیژیکو ګټو د ساتنې لپاره هر ډول لازم اقدام ترسره کړي او هېڅ بهرنی فشار به د دوی پر پرېکړو اغېز ونه کړي

سیاسي شنونکي باور لري، چې دا ډول توندې څرګندونې د تهران او واشنګټن ترمنځ د کړکېچ د لا زیاتېدو نښه ده

د دوی په وینا، که دواړه لوري د خبرو لپاره نرم دریځ غوره نه کړي، نو ښایي وضعیت لا پسې پېچلی شي او د سیمه‌ییز ثبات پر وړاندې نوې ننګونې راولاړې شي، په ځانګړي ډول په هغو سیمو کې چې سمندري لارې او د انرژۍ لېږد مهم رول لري