د روسیې او طالبانو د پوځي اړیکو پراخېدل؛ د سیمې د ځواک توازن ته نوې ننګونې

آزاد خبریال سمیع یوسفزی وایي، د روسیې او طالبانو ترمنځ د پوځي او سیاسي اړیکو وروستي پرمختګونه د افغانستان له داخلي وضعیت څخه ورهاخوا د سیمې د جیوپولیټیکو معادلو یوه مهمه برخه ګرځېدلې ده.

بریانیوز - چهارشنبه، ١٣جوزا ١٤٠٥

د هغه په وینا، مسکو په داسې حال کې چې له لویدیځ سره په اروپایي جبهه کې له دوامدارو سیاسي او امنیتي فشارونو سره مخ دی، هڅه کوي په منځنۍ اسیا کې خپل ستراتیژیک نفوذ لا پراخ کړي.

یوسفزی زیاتوي چې روسیه افغانستان د سیمې د امنیتي توازن لپاره یوه مهمه نقطه بولي او له همدې امله له طالبانو سره د اړیکو پراخول د خپلو سیمه‌ییزو ګټو د خوندي کولو یوه مهمه وسیله ګڼي. د هغه په وینا، د مسکو لومړیتوبونه د امنیتي ګواښونو کمول او د منځنۍ اسیا ثبات ساتل دي.

د سمیع یوسفزي له قوله، پاکستان چې له لویدیځ سره نږدې اړیکې لري، د دې بدلونونو په اړه اندېښمن ښکاري. هغه وايي د افغانستان او پاکستان ترمنځ وروستي سرحدي کړکېچونه او امنیتي پېښې د دواړو هېوادونو اړیکې لا نورې هم ترینګلې کړې دي.

یوسفزی زیاتوي چې طالبان هڅه کوي د نړیوالو قدرتونو ترمنځ متوازنه بهرنۍ پالیسي وساتي او نه غواړي د روسیې او لویدیځ ترمنځ د ستراتیژیکې سیالۍ په منځ کې راګیر شي.

د هغه په وینا، د افغانستان لپاره د عصري پوځي تجهیزاتو ترلاسه کول له اوږدې مودې راهیسې یوه مهمه غوښتنه پاتې شوې ده، خو که د روسیې او طالبانو ترمنځ پوځي همکاري لا پراخه شي، نو دا به د افغانستان او پاکستان ترمنځ حساسیتونه نور هم زیات کړي.

په پای کې یوسفزی ټینګار کوي چې د مسکو او کابل ترمنځ راټوکېدونکې اړیکې یوازې دوه اړخیزه موضوع نه ده، بلکې د منځنۍ او جنوبي اسیا د ځواک پر توازن او سیمه‌ییزو امنیتي معادلو ژور اغېز لرلای شي.