سیاست

د امریکا ولسمشر ټرمپ: د ایران هر نوی برید به له «۲۰ چنده سخت» غبرګون سره مخ شي

اشتراک گذاری:

بریانیوز پنجشنبه- ١۸ سرطان ١٤٠٥

د امریکا ولسمشر ویلي، د واشنګټن وروستي پوځي بریدونه د ایران له لوري پر درېیو بېړیو د ترسره شوي برید په غبرګون کې شوي دي

ټرمپ په خپلو څرګندونو کې خبرداری ورکړی چې که ایران بیا پر امریکایي ځواکونو یا ګټو برید وکړي، نو د امریکا ځواب به تر پخوا «شل چنده سخت» وي. د هغه په وینا، واشنګټن به د خپلو ځواکونو او ملي ګټو د ساتنې لپاره له پرېکنده اقدام څخه ډډه ونه کړي

هغه ټینګار وکړ چې امریکا د هر ډول ګواښ پر وړاندې د چټک او ځواکمن غبرګون وړتیا لري او ایران باید د کړکېچ د لا پراخېدو لامل نه شي

د ټرمپ څرګندونې په داسې حال کې کېږي چې په سیمه کې د امریکا او ایران ترمنځ ترینګلتیا یو ځل بیا لوړه شوې او وروستیو پوځي پېښو د دواړو هېوادونو ترمنځ اندېښنې زیاتې کړې دي

تر اوسه ایراني چارواکو د ټرمپ د وروستیو څرګندونو په اړه رسمي غبرګون نه دی ښودلی، خو شنونکي باور لري چې د دواړو هېوادونو ترمنځ د لفظي او پوځي فشارونو دوام کولای شي د سیمې پر امنیت او ثبات پراخ اغېز وکړي