کابل پوهنتون : د کابل د ښوونې او روزنې پوهنتون محصلان او استادان د دوامدار فشار او سپکاوي له امله اندېښمن دي

کابل پوهنتون : د کابل د ښوونې او روزنې پوهنتون محصلان او استادان د دوامدار فشار او سپکاوي له امله اندېښمن دي

بریانیوزسه شنبه - ۲۳ سرطان ١٤٠٥

کابل – د کابل د ښوونې او روزنې پوهنتون ځینې سرچینې ادعا کوي چې د پوهنتون محصلان او استادان د پوهنتون د مسؤلینو له لوري له دوامدار سپکاوي، توهین، رواني فشار او سخت چلند سره مخ دي، هغه وضعیت چې د دوی پر زده‌کړو، علمي فعالیتونو او راتلونکي هیلو یې منفي اغېز کړی دی

د سرچینو په وینا، محصلانو ته خبرداری ورکړل شوی چې که خپلې ږیرې وخریي، د هغوی د نمرو پایلې به صفر شي. همدارنګه، هغو محصلانو ته چې د فراغت سند ترلاسه کوي ویل شوي چې له ږیرې او خولۍ پرته به ورته د فراغت سند نه ورکول کېږي

سرچینې زیاتوي چې استادانو ته هم ویل شوي، که له علمي ترفیع وروسته خپلې ږیرې وخریي، موضوع به د لوړو زده‌کړو وزارت ته راپور شي او پر وړاندې به یې جدي اقدامات وشي

د سرچینو د معلوماتو له مخې، د پوهنتون مسؤلینو استادانو ته خبرداری ورکړی چې د ورکړل شویو لارښوونو له نه پلي کولو سره به له سخت چلند سره مخ شي

سرچینې همدارنګه ادعا کوي چې ځینې محصلان د خپلو ټولګیوالو په حضور کې سپک شوي او رټل شوي، چې له امله یې د زده‌کړو د دوام انګېزه کمزورې شوې او یو شمېر محصلان د پوهنتون له چاپېریاله ناهیلي شوي دي

تر اوسه د کابل د ښوونې او روزنې پوهنتون او د لوړو زده‌کړو وزارت د دغو ادعاوو په اړه رسمي غبرګون نه دی څرګند کړی، او دغه ادعاوې په خپلواکه توګه نه دي تایید شوې